വിജയ് ഹസാരെ ട്രോഫിയില്‍ വീണ്ടുമൊരു ഇരട്ട സെഞ്ച്വറി കൂടി. മുംബൈയുടെ 17-കാരന്‍ ഓപ്പണര്‍ യാശ്വസി ജൈസ്വാള്‍ ആണ് ഇരട്ട സെഞ്ച്വറി നേടി ഞെട്ടിച്ചിരിക്കുന്നത്. ജാര്‍ഖണ്ഡിനെതിരായ മത്സരത്തിലാണ് ഈ യുവതാരം ഇരട്ട സെഞ്ച്വറി സ്വന്തമാക്കിയത്.
ഇതോടെ ലിസ്റ്റ് എ ക്രിക്കറ്റില്‍ ഇരട്ട സെഞ്ച്വറി തികയിക്കുന്ന ഏറ്റവും പ്രായം കുറഞ്ഞ താരം എന്ന നേട്ടം യാശ്വസി സ്വന്തമാക്കി. കൂടാതെ 21-ാം നൂറ്റാണ്ടില്‍ ജനിച്ച ഒരു താരം നേടുന്ന ആദ്യ ഇരട്ട സെഞ്ച്വറിയും യാശ്വസിന്റെ പേരിലായി.
മുംബൈ ഇന്നിംഗ്‌സിന്റെ അവസാന ഓവറില്‍ പുറത്താകുന്നതിന് മുമ്പ് 154 പന്തുകളില്‍ 17 ബൗണ്ടറികളും, 12 സിക്‌സറുകളുമടക്കം 203 റണ്‍സാണ് താരം നേടിയത്. കൗമാര താരത്തിന്റെ ബാറ്റിംഗ് മികവില്‍ നിശ്ചിത 50 ഓവറില്‍ 358/3 എന്ന പടുകൂറ്റന്‍ സ്‌കോര്‍ നേടിയ മുംബൈ, പിന്നീട് ജാര്‍ഖണ്ടിനെ 319 റണ്‍സില്‍ പുറത്താക്കി 39 റണ്‍സിന്റെ വിജയം സ്വന്തമാക്കുകയും ചെയ്തു.
വിജയ് ഹസാര ട്രോഫിയില്‍ യാശ്വസ് നേടുന്ന മൂന്നാമത്തെ സെഞ്ച്വറിയാണിത്. നേരത്തെ കേരളത്തിനെതിരേയും ഗോവയ്‌ക്കെതിരേയും യാശ്വസ് സെഞ്ച്വറി നേടിയിരുന്നു.
ഈ ഇരട്ട സെഞ്ച്വറിയോടെ ലിസ്റ്റ് എ ക്രിക്കറ്റില്‍ ഇരട്ട സെഞ്ച്വറി നേടുന്ന ഏഴാമത്തെ ഇന്ത്യന്‍ താരമെന്ന നേട്ടവും യാശ്വസിക്ക് സ്വന്തമായി. സച്ചിന്‍ ടെണ്ടുല്‍ക്കര്‍, വീരേന്ദര്‍ സേവാഗ്, രോഹിത് ശര്‍മ്മ (3 തവണ), ശിഖാര്‍ ധവാന്‍, കെ വി കൗശല്‍, സഞ്ജു സാംസണ്‍ തുടങ്ങിയവരാണ് ഇതിന് മുമ്പ് ഈ നേട്ടം കൈവരിച്ച ഇന്ത്യന്‍ താരങ്ങള്‍. ഇതില്‍ കഴിഞ്ഞയാഴ്ച ഗോവയ്‌ക്കെതിരെ നടന്ന വിജയ് ഹസാരെ ട്രോഫി മത്സരത്തിലായിരുന്നു സഞ്ജുവിന്റെ ഇരട്ട സെഞ്ച്വറി പിറന്നത്.