ലോക ടെസ്റ്റ് ചാമ്പ്യന്‍ഷിപ്പ് കിരീടം തന്റെ കരിയറിലെ ഏറ്റവും ഉയര്‍ന്ന നേട്ടമാണെന്ന് ന്യൂസിലന്‍ഡ് പേസര്‍ നീല്‍ വാഗ്നര്‍. ന്യൂസിലന്‍ഡിനായി വൈറ്റ് ബോള്‍ ക്രിക്കറ്റ് കളിക്കാത്ത തനിക്ക് ഈ നേട്ടം കരിയറിന്റെ ഏറ്റവും ഉയര്‍ന്ന നിലയാണെന്ന് വാഗ്നര്‍ പറഞ്ഞു.
“എല്ലാവരുടെയും കാര്യം എനിക്ക് പറയാനാകില്ല. പക്ഷേ എന്നെ സംബന്ധിച്ച് ഇത് നേട്ടത്തിന്റെ കൊടുമുടിയാണ്. ഇന്ത്യയെ പോലെ നിലവാരമുള്ള ടീമിനെതിരെയുള്ള വിജയം കൂടിയായപ്പോള്‍ ഇത് വലിയ നേട്ടമായാണ് ഞാന്‍ മനസ്സിലാക്കുന്നത്. ഇത് കീവീസ് ആരാധകര്‍ക്കും എത്രമാത്രം വലിയ വിജയമാണെന്ന് എനിക്ക് ലഭിച്ച സന്ദേശങ്ങളില്‍ നിന്നും വ്യക്തമാണ്” വാഗ്നര്‍ പറഞ്ഞു.
ഫൈനലില്‍ ഇന്ത്യയ്‌ക്കെതിരെ മികച്ച ബോളിംഗ് പ്രകടനമാണ് വാഗ്നര്‍ കാഴ്ചവെച്ചത്. ആദ്യ ഇന്നിംഗില്‍ രണ്ട് വിക്കറ്റുകള്‍ വീഴ്ത്തിയ താരം രണ്ടാം ഇന്നിംഗ്‌സില്‍ ഒരു വിക്കറ്റും വീഴ്ത്തിയിരുന്നു. ഗില്‍, രഹാനെ, ജഡേജ എന്നിവരുടെ വിക്കറ്റുകളാണ് വാഗ്നര്‍ വീഴ്ത്തിയത്.
ഫൈനലില്‍ ഇന്ത്യ എല്ലാ മേഖലയിലും പരാജയപ്പെട്ട മത്സരത്തില്‍ ന്യൂസിലന്‍ഡ് എട്ട് വിക്കറ്റിനാണ് ജയിച്ചു കയറിയത്. രണ്ട് ദിവസം പൂര്‍ണമായും മഴയെടുത്ത മത്സരത്തിന്‍രെ റിസര്‍വ് ദിനത്തിലാണ് ന്യൂസിലന്‍ഡ് ജയിച്ചു കയറിയത്.