അന്താരാഷ്ട്ര ക്രിക്കറ്റിൽ നിന്നും വിരമിക്കൽ പ്രഖ്യാപനം നടത്തി വെസ്റ്റ് ഇൻഡീസ് താരം നിക്കോളാസ് പുരാൻ. ക്രിക്കറ്റ് പ്രേമികളെ ഒന്നടങ്കം ഞെട്ടിച്ച് 29ാം വയസിലാണ് വെടിക്കെട്ട് ബാറ്റർ വിരമിച്ചിരിക്കുന്നത്. വൈറ്റ് ബോൾ ക്രിക്കറ്റിൽ കഴിഞ്ഞ കുറച്ച് വർഷമായി വെസ്റ്റ് ഇൻഡീസിന്റെ എറ്റവും മികച്ച ബാറ്റർമാരിൽ ഒരാളായിരുന്നു പുരാൻ. അന്താരാഷ്ട്ര ട്വന്റി 20 ക്രിക്കറ്റിൽ വിൻഡീസിനായി ഏറ്റവും കൂടുതൽ റൺസ് നേടിയ ബാറ്ററാണ് അദ്ദേഹം.
വളരെ കഠിനമായ തീരുമാനമായിരുന്നു ഇതെന്നും എന്നാൽ ഒരുപാട് ആലോചിച്ച ശേഷമാണ് വിരമിക്കലിലേക്ക് എത്തിയതെന്നും പുരാൻ ഇൻസ്റ്റഗ്രാമിൽ കുറിച്ചു. ‘നമ്മൾ സ്നേഹിക്കുന്ന ഈ കളി ഒരുപാട് കാര്യങ്ങൾ തന്നിട്ടുണ്ട്, ഇനിയും തരും – സന്തോഷം, ലക്ഷ്യം, മറക്കാനാവാത്ത ഓർമ്മകൾ എന്നിവയെല്ലാം ക്രിക്കറ്റ് തന്നു. വെസ്റ്റ് ഇൻഡീസിനെ പ്രതിനിധീകരിക്കാനുള്ള അവസരം, ആ മെറൂൺ വസ്ത്രം ധരിച്ച്, ദേശീയഗാനത്തിനായി എഴുന്നേറ്റ്, ഓരോ തവണയും ഞാൻ കളിക്കളത്തിൽ കാലുകുത്തുമ്പോൾ എനിക്ക് ലഭിച്ചതെല്ലാം ക്രിക്കറ്റ് നൽകിയതാണ്…
അത് എനിക്ക് എത്രത്തോളം അർത്ഥമാക്കുന്നതെന്ന് വിവരിക്കാൻ പ്രയാസമാണ്. ക്യാപ്റ്റനായി വെസ്റ്റ് ഇൻഡീസ് ടീമിനെ നയിച്ചത് എന്റെ ഹൃദയത്തോട് ചേർത്തുപിടിക്കുന്ന ഒരു പദവിയാണ്,’ പുരാൻ ഇൻസ്റ്റഗ്രാമിൽ കുറിച്ചു.
2016ൽ വൈറ്റ് ബോൾ ക്രിക്കറ്റിൽ അരങ്ങേറ്റം കുറിച്ച പുരാൻ 61 ഏകദിനങ്ങളും 106 ടി-20 മത്സരങ്ങളും വെസ്റ്റ് ഇൻഡീസിനായി കളിച്ചിട്ടുണ്ട്. 2019ൽ ആരംഭിച്ച ഏകദിന കരിയറിൽ മൂന്ന് സെഞ്ച്വറികളും 11 അർദ്ധസെഞ്ച്വറികളും ഉൾപ്പെടെ 39.66 ശരാശരിയിലും 99.15 സ്‌ട്രൈക്ക് റേറ്റിലും 1983 റൺസ് നേടി. അന്താരാഷ്ട്രി ടി-20യിൽ 97 ഇന്നിങ്‌സുകൾ കളിച്ച പുരാൻ 136.39 സ്‌ട്രൈക്ക് റേറ്റിൽ 2275 റൺസ് നേടിയിട്ടുണ്ട്. 13 അർധശതകം ടി20യിൽ പുരാൻ നേടി.
ഐപിഎലിലും വർഷങ്ങളായി വിവിധ ടീമുകളുടെ ഭാഗമായി പുരാൻ കളിച്ചിട്ടുണ്ട്. നിലവിൽ ലഖ്നൗ സൂപ്പർ ജയന്റ്സിന്റെ പ്രധാന താരമാണ് അദ്ദേഹം.