2008ൽ ടൂർണമെൻ്റിൻ്റെ തുടക്കം മുതൽ റോയൽ ചലഞ്ചേഴ്‌സ് ബെംഗളൂരുവിന് ഐപിഎൽ ട്രോഫി നേടാനാകാത്തതിന് വിരാട് കോഹ്‌ലിക്കെതിരെ മുൻ ഇന്ത്യൻ താരം അമ്പാട്ടി റായിഡു. ലഖ്നൗ സൂപ്പർ ജയൻ്റ്‌സിനെതിരായ ഐപിഎൽ 2024 മത്സരത്തിൽ കോഹ്‌ലിയെ സ്പിന്നർ മണിമാരൻ സിദാർഥ് പുറത്താക്കിയതിന് പിന്നാലെയാണ് റായിഡു കോഹ്‌ലിക്ക് എതിരെ തിരിഞ്ഞത്.
വർഷങ്ങളായി ആർസിബിയുടെ ഏറ്റവും വലിയ പ്രശ്നം സ്ഥിരത കുറവാണ്. ഷെയ്ൻ വാട്‌സൺ, യുസ്‌വേന്ദ്ര ചാഹൽ, മിച്ചൽ സ്റ്റാർക്ക്, ശിവം ദുബെ തുടങ്ങിയ മാച്ച് വിന്നർമാരെ ഫ്രാഞ്ചൈസി ഈ കാലഘത്തിൽ ടീമിൽ നിലനിർത്തട്ടെ വിട്ടയക്കുകയും ചെയ്തു. വർഷങ്ങളോളം ആർസിബി ക്യാപ്റ്റനായിരുന്നു കോഹ്‍ലിയെന്നും പക്ഷേ ടീം ഒരിക്കലും ഗുണനിലവാരമുള്ള ബൗളർമാരെ വാങ്ങിയിട്ടില്ല എന്നുമാണ് അമ്പാട്ടി റായിഡു പറയുന്നത് . ഈ പ്രശ്നം വർഷം തോറും അവരെ ബാധിച്ചു. ബാറ്റിംഗ് ഓർഡർ പല കാലഘട്ടത്തിലും ലീഗിലെ ഏറ്റവും മികച്ചത് ആയിട്ട് കൂടി അവർക്ക് മത്സരം ജയിപ്പിക്കാൻ സാധിക്കാതെ ആയി.
“വിരാട് കോഹ്ലി ഏറെക്കാലം ആർസിബിയുടെ ക്യാപ്റ്റനായിരുന്നു. ലേലത്തിൽ അദ്ദേഹത്തിന്റെ ഭാഗത്ത് നിന്ന് അത്ര മികച്ച ഇടപെടൽ ഉണ്ടായില്ല. പക്ഷേ ടീം ഒരിക്കലും ഗുണനിലവാരമുള്ള ബൗളർമാരെ വാങ്ങിയില്ല. ടീമിൽ പ്രമുഖ താരങ്ങൾ പലരെയും നിലനിർത്താതെ പോയി. അതേ കളിക്കാർ മറ്റ് ഫ്രാഞ്ചൈസികൾക്കൊപ്പം ചേർന്നതിന് ശേഷം മികച്ച പ്രകടനം നടത്തി.”
“ഫ്രാഞ്ചൈസിക്ക് വേണ്ടി കോഹ്ലി 7000 റൺസിന് മുകളിൽ സ്‌കോർ ചെയ്തിട്ടുണ്ട്, എന്നാൽ ആർസിബിക്ക് വേണ്ടി ഏറ്റവും കൂടുതൽ റൺസ് നേടുന്നവരുടെ പട്ടികയിലുള്ള മറ്റൊരു ബാറ്ററുടെ പേര് പറയൂ. ആ ലിസ്റ്റിലെ അടുത്ത താരം ഡിവില്ലേഴ്‌സ് ആണ്. ഒരു കളിക്കാരൻ്റെ തോളിൽ കയറി ഒരു ടീമിന് ട്രോഫി നേടാനാവില്ല, ”അമ്പാട്ടി റായിഡു സ്റ്റാർ സ്പോർട്സിൽ പറഞ്ഞു.
ലഖ്നൗ സൂപ്പര്‍ ജയന്റ്സിനെതിരെ ടോപ് ഓര്‍ഡര്‍ ബാറ്റിംഗില്‍ പരാജയപ്പെട്ടതിലെ അസ്വസ്തത പരസ്യമാക്കി ആര്‍സിബി ക്യാപ്റ്റന്‍ ഫാഫ് ഡുപ്ലെസിസ്. ടോസ് നേടി ലഖ്‌നൗവിനെ ആദ്യം ബാറ്റ് ചെയ്യാന്‍ ക്ഷണിച്ചെങ്കിലും 28 റണ്‍സിന് ആര്‍സിബി മത്സരത്തില്‍ പരാജയപ്പെട്ടു. ഫ്‌ലാറ്റ് ട്രാക്ക് പ്രയോജനപ്പെടുത്താനാണ് ഫാഫ് ആലോചിച്ചതെങ്കിലും എല്‍എസ്ജി ബോളര്‍മാര്‍ വിരാട് കോഹ്ലി, കാമറൂണ്‍ ഗ്രീന്‍, ഗ്ലെന്‍ മാക്സ്വെല്‍ എന്നിവരെ പെട്ടെന്ന് പുറത്താക്കി. ഫാഫ് റണ്ണൗട്ടായി പുറത്തായതിനാല്‍ ടീമിനെ മുന്നില്‍ നിന്ന് നയിക്കുന്നതില്‍ പരാജയപ്പെട്ടു.