ഐ.സി.സി ടെസ്റ്റ് റാങ്കിംഗില്‍ ചരിത്രനേട്ടം സ്വന്തമാക്കി വെസ്റ്റിന്‍ഡീസ് ക്യാപ്റ്റന്‍ ജേസണ്‍ ഹോള്‍ഡര്‍. ടെസ്റ്റ് ബൗളര്‍മാരുടെ റാങ്കിംഗില്‍ ഹോള്‍ഡര്‍ രണ്ടാം സ്ഥാനത്തെത്തി. 862 റേറ്റിംഗ് പോയിന്റുമായിട്ടാണ് ഹോള്‍ഡറുടെ കുതിപ്പ്. കഴിഞ്ഞ 20 വര്‍ഷത്തിനിടെ ഒരു വിന്‍ഡീസ് ബൗളര്‍ക്ക് ലഭിക്കുന്ന ഏറ്റവും മികച്ച റേറ്റിംഗ് പോയിന്റാണിത്.
ഇംഗ്ലണ്ടിനെതിരായ മികച്ച പ്രകടനമാണ് ഹോള്‍ഡര്‍ക്ക് ചരിത്രക്കുതിപ്പ് സമ്മാനിച്ചത്. ആദ്യ ഇന്നിംഗ്സില്‍ ആറു വിക്കറ്റെടുത്ത ഹോള്‍ഡര്‍ മത്സരത്തിലാകെ ഏഴു വിക്കറ്റ് വീഴ്ത്തിയിരുന്നു. 485 റേറ്റിംഗ് പോയിന്റുമായി ഹോള്‍ഡര്‍ ടെസ്റ്റ് ഓള്‍റൗണ്ടര്‍മാരുടെ റാങ്കിങ്ങില്‍ ഒന്നാം സ്ഥാനത്തുണ്ട്. ഇംഗ്ലീഷ് താരം ബെന്‍ സ്റ്റോക്ക്‌സാണ് ഇതില്‍ രണ്ടാം സ്ഥാനത്ത്. ഇന്ത്യയുടെ രവീന്ദ്ര ജഡേജയാണ് ഓള്‍റൗണ്ടര്‍മാരുടെ റാങ്കിങ്ങില്‍ മൂന്നാമതുള്ളത്. അശ്വിന്‍ അഞ്ചാം സ്ഥാനത്തുണ്ട്.
904 റേറ്റിംഗ് പോയിന്റുള്ള ഒസീസിന്റെ പാറ്റ് കമ്മിന്‍സാണ് ബോളര്‍മാരുടെ പട്ടികയില്‍ ഒന്നാമത്. നീല്‍ വാഗ്‌നര്‍, സൗത്തീ, റബാഡ എന്നിവരാണ് യഥാക്രമം മൂന്നും നാലും അഞ്ചും സ്ഥാനങ്ങളില്‍. ജസ്പ്രീത് ഭുംറയാണ് ആദ്യ പത്തിലുള്ള ഏക ഇന്ത്യന്‍ ബൗളര്‍. 779 റേറ്റിംഗ് പോയിന്റുമായി ഏഴാം സ്ഥാനത്താണ് ഭുംറ.
ബാറ്റ്‌സ്മാന്‍മാരുടെ പട്ടികയില്‍ 911 റേറ്റിംഗ് പോയിന്റുള്ള ഓസീസിന്റെ സ്റ്റീവ് സ്മിത്താണ് ഒന്നാമത്. ഇന്ത്യന്‍ നായകന്‍ വിരാട് കോഹ് ലി 886 പോയിന്റുമായി രണ്ടാം സ്ഥാനത്തുണ്ട്. ഇന്ത്യയുടെ ചേതശ്വര്‍ പൂജാരയും അജിങ്ക്യ രഹാനെയും യഥാക്രമം ഏഴും ഒന്‍പതും സ്ഥാനങ്ങളിലുണ്ട്.