ഓസ്ട്രേലിയക്കെതിരായ ടെസ്റ്റ് പരമ്പരയില്‍ തുടര്‍ച്ചയായ മൂന്നാം ഇന്നിംഗ്സിലും അനാവശ്യ ഷോട്ട് കളിച്ച് വിക്കറ്റ് വലിച്ചെറിഞ്ഞ വൈസ് ക്യാപ്റ്റനും ഓപ്പണറുമായ രോഹിത് ശര്‍മയെ വിമര്‍ശിച്ച് മുന്‍ ഇതിഹാസം സുനില്‍ ഗവാസ്‌കര്‍. ഗബ്ബയില്‍ നടക്കുന്ന മത്സരത്തിലും രോഹിത് മികച്ച രീതിയില്‍ ബാറ്റ് ചെയ്യവേ അനാവശ്യ ഷോട്ട് കളിച്ച് പുറത്തായതിന്റെ പശ്ചാത്തലത്തിലാണ് കമന്ററി പറയവേ ഗവാസ്‌കറിന്റെ വിമര്‍ശനം.
“തീര്‍ത്തും അവിശ്വസനീയവും നിരുത്തരവാദപരവുമായ ഷോട്ടാണ് രോഹിത് കളിച്ചത്. ഒരിക്കലും കളിക്കാന്‍ പാടില്ലാത്തതായിരുന്നു അത്. ലോംഗ് ഓണില്‍ ഒരു ഫീല്‍ഡറുണ്ടായിരുന്നു, ഡീപ്പ് സ്‌ക്വയര്‍ ലെഗിലും ഫീല്‍ഡറുണ്ടായിരുന്നു. നിങ്ങള്‍ കുറച്ചു ബോള്‍ മുമ്പ് ഒരു ബൗണ്ടറി നേടിയതാണ്, പിന്നെ എന്തിനായിരുന്നു ഇങ്ങനെയൊരു ഷോട്ട്?”
“നിങ്ങളൊരു സീനിയര്‍ താരമാണ്. അതിനാല്‍ ഇതില്‍ നിന്നും ഒഴിഞ്ഞു മാറാന്‍ കഴിയില്ല. തീര്‍ത്തും അനാവശ്യമായാണ് വിക്കറ്റ് നഷ്ടപ്പെടുത്തിയത്” ഗവാസ്‌കര്‍ പറഞ്ഞു. സിക്സറിലൂടെ ഫിഫ്റ്റി തികയ്ക്കാനുള്ള രോഹിത്തിന്റെ ശ്രമമാണ് വിക്കറ്റില്‍ കലാശിച്ചത്. സ്പിന്നര്‍ നതാന്‍ ലിയോണിനായിരുന്നു വിക്കറ്റ്.
ലിയോണിനെ അഞ്ചാമത്തെ ബോളില്‍ സിക്സര്‍ പറത്താനുള്ള രോഹിത്തിന്റെ ശ്രമം പാളി. കണക്കുകൂട്ടല്‍ തെറ്റിച്ച് ബോള്‍ ടേണ്‍ ചെയ്തു. ഇതോടെ രോഹിത്തിന്റെ ടൈമിംഗും പിഴച്ചു. മിഡ് വിക്കറ്റില്‍ മിച്ചെല്‍ സ്റ്റാര്‍ക്ക് റണ്ണിംഗ് ക്യാച്ചിലൂടെ രോഹിത്തിന്റെ മികച്ച ഇന്നിംഗ്സ് അവസാനിപ്പിച്ചു. 74 ബോള്‍ നേരിട്ട് രോഹിത് 6 ഫോറുകളുടെ അകമ്പടിയില്‍ 44 റണ്‍സ് നേടി നില്‍ക്കെയാണ് പുറത്തായത്.