ഇംഗ്ലണ്ടിനെതിരായ അഞ്ച് മത്സരങ്ങൾ അടങ്ങുന്ന ടെസ്റ്റ് പരമ്പര ജൂൺ 20നാണ് ആരംഭിക്കുക. യുവതാരങ്ങൾക്ക് പ്രാധാന്യം നൽകിയുളള ഇന്ത്യൻ ടീമിനെയാണ് ഇത്തവണ സെലക്ടർമാർ പ്രഖ്യാപിച്ചത്. ശുഭ്മാൻ ഗിൽ നായകനായ ടീമിൽ കരുൺ നായർ, സായി സുദർശൻ, അഭിമന്യൂ ഈശ്വരൻ, അർഷ്ദീപ് സിങ് എന്നിവരും ഇടംനേടി. എന്നാൽ വിരാട് കോഹ്ലിയും രോഹിത് ശർമ്മയും വിരമിച്ച ഒഴിവിലേക്ക് ശ്രേയസ് അയ്യരെ ഇംഗ്ലണ്ട് പരമ്പരയിൽ പരിഗണിക്കാതിരുന്നത് എല്ലാവരെയും ഞെട്ടിച്ചു.
ഇംഗ്ലണ്ടിനെതിരെ ശ്രേയസ് ടീമിൽ വേണമായിരുന്നുവെന്ന് പറയുകയാണ് മുൻ ഇന്ത്യൻ ക്യാപ്റ്റൻ സൗരവ് ഗാംഗുലി. ഐപിഎൽ ഈ സീസണിൽ മിന്നുംഫോമിലായിരുന്ന ശ്രേയസ് 2024-25 രഞ്ജി സീസണിലും ശ്രദ്ധേയ പ്രകടനമാണ് കാഴ്ചവച്ചത്. 68.57 ആയിരുന്നു താരത്തിന്റെ ശരാശരി. ഐപിഎലിൽ പഞ്ചാബ് കിങ്സ് ഫൈനലിൽ എത്തിയതിൽ ക്യാപ്റ്റനായ ശ്രേയസ് അയ്യരുടെ ഇന്നിങ്സുകളും നിർണായ പങ്കാണ് വഹിച്ചത്
“കഴിഞ്ഞ ഒരുവർഷമായി ശ്രേയസ് അവന്റെ മികച്ചത് പുറത്തെടുത്തിരുന്നുവെന്ന് ഗാംഗുലി പറയുന്നു. ഇംഗ്ലണ്ടിനെതിരായ ഇന്ത്യൻ ടീമിൽ അവനും വേണമായിരുന്നു. കഴിഞ്ഞ ഒരു വർഷം ശ്രേയസിന്റെ മികച്ച സമയമായിരുന്നു. ഒഴിവാക്കപ്പെട്ട കളിക്കാരനല്ല അവൻ. സമ്മർദ്ദത്തിൽ ശ്രേയസ് ഇപ്പോൾ സ്കോർ ചെയ്യുന്നു, ഉത്തരവാദിത്തം ഏറ്റെടുക്കുന്നു, ഷോർട്ട് ബോൾ നന്നായി കളിക്കുന്നു. ടെസ്റ്റ് ക്രിക്കറ്റ് വ്യത്യസ്തമാണെങ്കിലും, ശ്രേയസിന് എന്ത് ചെയ്യാൻ കഴിയുമെന്ന് കാണാൻ ഈ പരമ്പരയിൽ അവനെ ഉൾപ്പെടുത്തണമായിരുന്നു”, ഗാംഗുലി പറഞ്ഞു.