സഞ്ജു സാംസണെ ചാമ്പ്യന്സ് ട്രോഫി ഇന്ത്യന് ടീമില് ഉള്പ്പെടുത്താത്തതിനെ തുടര്ന്നുണ്ടായ വിവാദത്തില് മുന് ഇന്ത്യന് താരം എസ് ശ്രീശാന്തിന് വിലക്കേര്പ്പെടുത്തി കേരള ക്രിക്കറ്റ് അസോസിയേഷന്. കെസിഎക്കെതിരെ സത്യവിരുദ്ധമായതും അപമാനകരവുമായതുമായ പ്രസ്താവന നടത്തിയെന്നാരോപിച്ചാണ് ശ്രീശാന്തിന് മൂന്ന് വര്ഷത്തെ വിലക്ക്. കേരളത്തില് നിന്നുളള രാജ്യാന്തര താരമെന്ന നിലയില് സഞ്ജുവിനൊപ്പം നില്ക്കണമെന്നും ക്രൂശിക്കരുതെന്നുമായിരുന്നു ശ്രീശാന്ത് പറഞ്ഞത്.
ബുധനാഴ്ച എറണാകുളത്ത് ചേര്ന്ന കേരള ക്രിക്കറ്റ് അസോസിയേഷന്റെ പ്രത്യേക ജനറല് ബോഡി യോഗത്തിലാണ് ഇത് സംബന്ധിച്ച് തീരുമാനമെടുത്തതെന്ന് അധികൃതര് അറിയിച്ചു. കേരള ക്രിക്കറ്റ് ലീഗില് ഫ്രാഞ്ചൈസി ടീമായ കൊല്ലം ഏരീസ് സഹ ഉടമയാണ് ശ്രീശാന്ത്. കേരള ക്രിക്കറ്റ് ലീഗ് ടീമിന്റെ സഹഉടമ എന്ന നിലയില് കെസിഎയുമായി കരാറുളള ശ്രീശാന്തിന്റെ ഇത്തരം പ്രതികരണങ്ങള് അച്ചടക്ക ലംഘനമാണെന്ന് വിലയിരുത്തി താരത്തിന് കാരണം കാണിക്കല് നോട്ടിസ് നല്കിയിരുന്നു.
സഞ്ജു സാംസണിന്റെ പേരില് അടിസ്ഥാനരഹിതമായ ആരോപണങ്ങള് ഉന്നയിച്ച പിതാവ് സാംസണ് വിശ്വനാഥ്, റെജി ലൂക്കോസ്, ചാനല് അവതാരക എന്നിവര്ക്കെതിരെ നഷ്ടപരിഹാരത്തിന് കേസ് നല്കാനും ജനറല് ബോഡി യോഗത്തില് തീരുമാനമായതായും കേരള ക്രിക്കറ്റ് അസോസിയേഷന് അറിയിച്ചു.