ഐപിഎല് സീസണിലെ തരക്കേടില്ലാത്ത പ്രകടനം പോലും ഇന്ത്യന് ടീമില് തിരിച്ചെത്താന് സഞ്ജു സാംസണെ സഹായിക്കുമെന്ന് കരുതുന്നില്ലെന്ന് ഇന്ത്യന് മുന് താരം മനോജ് തിവാരി. ഇത്തവണ രാജസ്ഥാന് റോയല്സിനു വേണ്ടി 600ന് മുകളില് റണ്സെങ്കിലും സഞ്ജു സാംസണ് നേടിയേ തീരൂവെന്നും നിലവിലെ സാഹചര്യത്തില് ഇന്ത്യന് ടീമിലെത്താന് മതിയാകാതെ 400-500 റണ്സൊന്നും വരുമെന്നും താരം നിരീക്ഷിച്ചു.
600ന് മുകളില് റണ്സെങ്കിലും ഇത്തവണ രാജസ്ഥാന് റോയല്സിനു വേണ്ടി സഞ്ജു സാംസണ് തീര്ച്ചയായും നേടിയേ തീരൂ. കാരണം ഐപിഎല്ലിനു ശേഷം ഒരുപാട് ടൂര്ണമെന്റുകളൊന്നും ഇനി നടക്കാനിരിക്കുന്നില്ല. അതുകൊണ്ടു തന്നെ സഞ്ജുവിന് ദേശീയ ടീമില് അവസരം ലഭിക്കുമോ, ഇല്ലയോയെന്നു നമുക്കറിയില്ല. അതുകൊണ്ടു തന്നെ നിലവില് സഞ്ജുവിന്റെ പക്കലുള്ളത് ഐപിഎല്ലിലെ 14 മല്സരങ്ങളാണ്. റോയല്സ് പ്ലേഓഫിലേക്കു യോഗ്യത നേടിയാല് മാത്രമേ അദ്ദേഹത്തിനു കൂടുതല് അവസരങ്ങള് ലഭിക്കുകയുള്ളൂ.
ഒരു ദീര്ഘകാല ലക്ഷ്യത്തോടെയായിരിക്കണം സഞ്ജു സാംസണ് കളിക്കേണ്ടത്. ഒരു സമയത്തു ഒരു മല്സരമെന്ന നിലയില് അദ്ദേഹം പരിഗണിക്കുകയും വേണം. റണ്സ് നേടിയിട്ടും ഇന്ത്യന് ടീമില് അവസരം ലഭിക്കാതെ വരുമ്പോള് അത് ഏറെ നിരാശപ്പെടുത്തും. അതോടൊപ്പം തനിക്കു പകരം ടീമില് കളിക്കുന്നയാള് പെര്ഫോം ചെയ്യാതിരിക്കുന്നതു കാണുമ്പോള് വല്ലാത്തൊരു മാനസികാവസ്ഥയായിരിക്കും ഉണ്ടാവുക. അത്തരമൊരു ഘട്ടത്തില് മനസ്സിനെ സ്വയം നിയന്ത്രിച്ചു നിര്ത്തുകയെന്നത് വളരെ ബുദ്ധിമുട്ടേറിയ കാര്യമാണ്.
സഞ്ജു വളരെ സ്പെഷ്യലായിട്ടുള്ള പ്ലെയറാണ്. സഞ്ജുവുമായി എനിക്കു വളരെയധികം കണക്ട് ചെയ്യാന് സാധിക്കും. കാരണം ഞാനും അതേ സാഹചര്യങ്ങളിലൂടെ കടന്നു പോയിട്ടുള്ള താരമാണ്. സഞ്ജുവിന്റെ മാനസികാവസ്ഥ എനിക്കു ശരിക്കും മനസ്സിലാവും. ഏഴു വര്ഷത്തിനിടെ വെറും ഏഴു ഏകദിനങ്ങളിലും ഒരു ടി20യിലും മാത്രമാണ് എനിക്കു കളിക്കാന് അവസരം ലഭിച്ചത്- തിവാരി പറഞ്ഞു.