ഐ.പി.എല്ലിനേക്കാള്‍ പ്രയോജനം നല്‍കുന്നത് പാകിസ്ഥാന്‍ സൂപ്പര്‍ ലീഗ് അടക്കമുള്ള മറ്റ് ടൂര്‍ണമെന്റുകളാണെന്ന് ദക്ഷിണാഫ്രിക്കന്‍ പേസര്‍ ഡെയ്ന്‍ സ്റ്റെയിന്‍. ഐ.പി.എല്ലില്‍ കളികാരന്റെ പ്രൈസ് ടാഗിനാണ് മറ്റെല്ലാത്തിനേക്കാളും പ്രാധാന്യമെന്നും അതിനാലാണ് താന്‍ ഐ.പി.എല്ലില്‍ നിന്ന് അവധിയെടുക്കാന്‍ തീരുമാനിച്ചതെന്നും സ്റ്റെയിന്‍ പറഞ്ഞു.
“ഐ.പി.എല്ലില്‍ നിന്ന് എനിക്ക് ഒരു ഇടവേള ആവശ്യമായിരുന്നു. മറ്റ് ലീഗുകളില്‍ കളിക്കുന്നത് ഒരു കളിക്കാരനെന്ന നിലയില്‍ കൂടുതല്‍ പ്രയോജനകരമാണെന്ന് ഞാന്‍ മനസ്സിലാക്കി. ഐ.പി.എല്ലിലേക്ക് പോകുമ്പോള്‍ വലിയ സ്‌ക്വാഡുകളും, വലിയ താരങ്ങളും, കളിക്കാര്‍ക്ക് ലഭിക്കുന്ന പണത്തിന്റെ അളവുമൊക്കെയാണ് പ്രധാന ചര്‍ച്ചാവിഷയം. അവിടെ ക്രിക്കറ്റിനെക്കുറിച്ച് തന്നെ മറന്ന് പോകുന്നു.”
“അതേസമയം, പാകിസ്ഥാന്‍ സൂപ്പര്‍ ലീഗിലേക്കും, ശ്രീലങ്കന്‍ പ്രീമിയര്‍ ലീഗിലേക്കും വരുമ്പോള്‍ അവിടെ ക്രിക്കറ്റിന് പ്രാധാന്യമുണ്ട്. എന്നാല്‍ ഐ.പി.എല്ലില്‍ നിങ്ങള്‍ക്ക് എത്ര രൂപയാണ് ലഭിച്ചത് എന്നതാണ് പ്രധാന ചര്‍ച്ചാവിഷയം. സത്യത്തില്‍ അതു കൊണ്ടാണ് അവിടെ നിന്ന് വിട്ടു നില്‍ക്കാന്‍ ഞാന്‍ ആഗ്രഹിച്ചത്.” ക്രിക്കറ്റ് പാകിസ്ഥാനോട് സംസാരിക്കവെ സ്റ്റെയ്ന്‍ പറഞ്ഞു. പാകിസ്ഥാന്‍ സൂപ്പര്‍ ലീഗില്‍ ക്വട്ട ഗ്ലാഡിയേറ്റേഴ്‌സിന്റെ താരമാണ് സ്റ്റെയിന്‍.
ബാംഗ്ലൂരിന്റെ താരമായിരുന്ന സ്റ്റെയിന്‍ ഈ വര്‍ഷം ജനുവരിയിലാണ് വരുന്ന ഐ.പി.എല്‍ സീസണില്‍ നിന്ന് പിന്മാറുന്നതായി അറിയിച്ചത്. കഴിഞ്ഞ ഐ.പി.എല്ലില്‍ മൂന്നുമത്സരങ്ങള്‍ മാത്രം കളിച്ച സ്റ്റെയ്‌നിന് ഒരു വിക്കറ്റ് മാത്രമാണ് വീഴ്ത്താനായത്. ഫോം ഔട്ടായതിനെ തുടര്‍ന്ന് താരത്തിനെ മിക്ക മത്സരങ്ങളിലും പുറത്തിരുത്തുകയായിരുന്നു.