ഓസ്ട്രേലിയ – ഇന്ത്യ ഫൈനൽ മത്സരം കാണാൻ ഒരുങ്ങി ഇരിക്കുകയാണ് ക്രിക്കറ്റ് ലോകം. ടൂർണമെന്റിൽ ഇതുവരെയുള്ള എല്ലാ മത്സരങ്ങളും ജയിച്ച ഇന്ത്യയും ആദ്യ രണ്ട് മത്സരങ്ങളും തോറ്റ ശേഷം മനോഹരമായി തിരിച്ചെത്തിയ കങ്കാരൂ പടയും ഏറ്റുമുട്ടുമ്പോൾ ആവേശം പരകോടിയിൽ എത്തുമെന്ന് ഉറപ്പാണ്. ഫൈനലിന് മുമ്പ് ഓസ്ട്രേലിയൻ താരം ട്രാവിസ് ഹെഡുമായി ബന്ധപ്പെട്ട ഒരു കണക്ക് ഇന്ത്യൻ ആരാധകരെ ഞെട്ടിപ്പിക്കുന്നതാണ്.
ട്രെവിസ് ഹെഡ് രണ്ട് ഐസിസി നോക്ക്ഔട്ട് മത്സരങ്ങളിലാണ് ഇതിന് മുമ്പ് കളിച്ചിട്ടുള്ളത്. ഒന്ന് ലോക ടെസ്റ്റ് ചാംപ്യൻഷിപ് ഫൈനൽ മത്സരമായിരുന്നു, മറ്റൊന്ന് ഇന്നലെ നടന്ന സെമിഫൈനൽ പോരാട്ടത്തെ. രണ്ടിലും താരമായിരുന്നു മാൻ ഓഫ് ദി മാച്ച്. അന്ന് ലോക ടെസ്റ്റ് ചാംപ്യൻഷിപ് ഫൈനലിൽ ഇന്ത്യയെ തകർത്തെറിഞ്ഞ ഇന്നിംഗ്സ് കാഴ്ചവെച്ച ഹെഡ് ഇന്നലെയും മനോഹരമായി തന്നെയാണ് കളിച്ചത്. താരത്തിന്റെ ഇന്നിംഗ്സ് ആയിരുന്നു കളിയിലെ ട്വിസ്റ്റ് ആയ നിമിഷമെന്നും പറയാം. ചുരുക്കി പറഞ്ഞാൽ താരം ഓസ്ട്രേലിയയുടെ ഭാഗ്യ നക്ഷത്രം തന്നെയാണ്.
ഹെഡിനെ തുടക്കത്തിൽ തന്നെ പുറത്താക്കത്തിന്റെ ബുദ്ധിമുട്ട് ഇന്ത്യ ലോക ടെസ്റ്റ് ചാമ്പ്യൻഷിപ്പിൽ അനുഭവിച്ചതാണ്. മറ്റൊരുവട്ടം കൂടി ഒരു തിരിച്ചടി ഇന്ത്യ താങ്ങില്ല. അതിനാൽ തന്നെ ഹെഡിനെ പുറത്താക്കി തുടക്കത്തിൽ തന്നെ മേധാവിത്വം സ്ഥാപിക്കുക എന്നത് തന്നെ ആയിരിക്കും ഇന്ത്യയുടെ പരമ പ്രധാനമായ ലക്ഷ്യം.
ഈഡൻ ഗാർഡൻസിൽ നടന്ന മത്സരത്തിൽ സൗത്താഫ്രിക്കയെ തോൽപ്പിച്ച് ഓസ്ട്രേലിയ ഫൈനലിൽ എത്തുക ആയിരുന്നു. ആദ്യം ബാറ്റ് ചെയ്ത സൗത്താഫ്രിക്ക 212 റൺസിന് പുറത്തായപ്പോൾ ഓസ്ട്രേലിയ 3 വിക്കറ്റ് മാത്രം ബാക്കി നിൽക്കെ ആവേശ ജയം സ്വന്തമാക്കുക ആയിരുന്നു. സൗത്താഫ്രിക്കൻ ബാറ്ററുമാരുടെ മോശം പ്രകടനമാണ് അവരെ കളിയിൽ തോൽപ്പിച്ചതെന്ന് പറയാം .