ഐപിഎല് പ്ലേഓഫിന് ഒരുങ്ങുന്ന റോയല് ചലഞ്ചേഴ്സ് ബെംഗളൂരു ടീമിന് തിരിച്ചടിയായി സ്റ്റാര് പേസറുടെ പരിക്ക്. ആര്സിബിയുടെ പ്രധാന ബോളര്മാരില് ഒരാളായ ലുങ്കി എന്ഗിടി ഇനിയുളള മത്സരങ്ങളില് ടീമിന് വേണ്ടി കളിക്കില്ല. ദക്ഷിണാഫ്രിക്കന് താരം ഇനി ഈ സീസണില് കളിക്കില്ലെന്ന് ആര്സിബി സ്ഥിരീകരിച്ചിട്ടുണ്ട്. സിംബാബ്വെ പേസര് ബ്ലെസിങ് മുസറബാനിയാണ് എന്ഗിടിക്ക് പകരക്കാരനായി ആര്സിബിക്ക് വേണ്ടി കളിക്കുക. അന്താരാഷ്ട്ര ക്രിക്കറ്റില് ദക്ഷിണാഫ്രിക്കയ്ക്ക് വേണ്ടി കളിക്കാനുളളതുകൊണ്ടാണ് ലുങ്കി എന്ഗിടി ഐപിഎലില് നിന്ന് പിന്മാറിയത്.
അടുത്തിടെ ചെന്നൈ സൂപ്പര് കിങ്സിനെതിരെയുളള മത്സരത്തില് ആര്സിബിക്കായി പന്തെറിഞ്ഞ് മൂന്ന് വിക്കറ്റുകള് നേടിയിരുന്നു താരം. ജോഷ് ഹേസല്വുഡിന് പകരമായിട്ടാണ് അന്ന് എന്ഗിടി കളിച്ചത്. അതേസമയം ആര്സിബിയുടെ മറ്റുചില താരങ്ങളും പരിക്കിന്റെ പിടിയിലാണെന്ന് നേരത്തെ റിപ്പോര്ട്ടുകളുണ്ടായിരുന്നു. നായകന് രജത് പാട്ടിധാര്, പേസര് ജോഷ് ഹേസല്വുഡ് എന്നിവരുടെ പേരുകളാണ് പറഞ്ഞുകേട്ടത്.
അന്താരാഷ്ട്ര ടി20യില് സിംബാബ്വെ ടീമിനായി 118 മത്സരത്തില് 127 വിക്കറ്റുകള് മുസറബാനി വീഴ്ത്തിയിട്ടുണ്ട്. 19.23 ആണ് താരത്തിന്റെ സ്ട്രൈക്ക് റേറ്റ്, എക്കണോമി 7.24ഉം. ഹേസല്വുഡും എന്ഗിടിയും ഇല്ലാത്ത സാഹചര്യത്തില് മുസറബാനി ആര്സിബിയുടെ പ്രധാന പേസര്മാരില് ഒരാളായി കളിക്കാനാണ് സാധ്യത. നിലവില് ഐപിഎല് പോയിന്റ് ടേബിളില് രണ്ടാം സ്ഥാനത്താണ് ആര്സിബിയുളളത്. 12 മത്സരങ്ങളില് എട്ട് ജയവും മൂന്ന് തോല്വിയും ഉള്പ്പെടെ 17 പോയിന്റാണ് അവര്ക്കുളളത്.