നോട്ട്ബുക്ക് സെലിബ്രേഷന് നടത്തി ഐപിഎല് ഈ സീസണില് വാര്ത്തകളില് നിറഞ്ഞ താരമാണ് ലഖ്നൗ സൂപ്പര് ജയന്റ്സിന്റെ ദിഗ്വേഷ് രാതി. എല്ലാ കളികളിലും താരങ്ങളെ പുറത്താക്കിയ ശേഷമാണ് തന്റെ നോട്ട്ബുക്ക് സെലിബ്രേഷന് ദിഗ്വേഷ് നടത്താറുളളത്. ഇതിന്റെ പേരില് പലതവണ എല്എസ്ജി താരത്തിനെതിരെ ബിസിസിഐ പിഴ ചുമത്തിയിരുന്നു. എന്നാല് ഇതൊന്നും അത്ര കാര്യമാക്കാതെ ദിഗ്വേഷ് അദ്ദേഹത്തിന്റെ സെലിബ്രേഷന് തുടര്ന്നു.
കഴിഞ്ഞ ദിവസം ബെംഗളൂരു താരത്തെ മങ്കാദിങ് നടത്തിയതിന്റെ പേരിലാണ് ലഖ്നൗ താരം വാര്ത്തകളില് നിറഞ്ഞത്. പതിനേഴാം ഓവറിന്റെ അവസാന പന്തില് ജിതേഷ് ശര്മ്മയെ ആണ് മങ്കാദിങ് ചെയ്യാന് ദിഗ്വേഷ് ശ്രമിച്ചത്. എന്നാല് ഇത് തേര്ഡ് അംപയര് നോട്ടൗട്ട് വിളിക്കുകയായിരുന്നു. അതേസമയം മത്സരശേഷം ദിഗ്വേഷിനെ പുകഴ്ത്തിയായിരുന്നു എല്എസ്ജി നായകന് റിഷഭ് പന്ത് സംസാരിച്ചത്. ലഖ്നൗ ടീമിന്റെ ഈ വര്ഷത്തെ പോസിറ്റീവുകളില് ഒന്നാണ് ദിഗ്വേഷ് രാതിയെന്ന് ക്യാപ്റ്റന് പന്ത് തുറന്നുപറഞ്ഞു.
ബാറ്റിങ് യൂണിറ്റ് മെച്ചപ്പെട്ടതിനെ പ്രശംസിച്ചാണ് പന്ത് തുടങ്ങിയത്. ചില പ്രത്യേക ബോളിങ് പ്രകടനങ്ങളും ഇത്തവണ ഉണ്ടായിട്ടുണ്ടെന്ന് പന്ത് പറഞ്ഞു. ദിഗ്വേഷ് രാതി അവരില് ഒരാളാണ്. ആവേശ് ചില നിര്ണായക ഓവറുകള് എറിഞ്ഞു. ഞങ്ങള്ക്ക് അവസരങ്ങള് ലഭിച്ചുകൊണ്ടിരുന്നു. പക്ഷേ അത് കൂടുതല് സമയം നിലനിര്ത്താന് കഴിഞ്ഞില്ല, മത്സരശേഷം റിഷഭ് പന്ത് പറഞ്ഞു.
ആര്സിബിയോട് ആറ് വിക്കറ്റിന് തോറ്റതിന് പിന്നാലെ ഐപിഎല് 2025ല് മത്സരങ്ങള് പൂര്ത്തിയാക്കി മടങ്ങുകയാണ് ലഖ്നൗ സൂപ്പര് ജയന്റ്സ്. ആദ്യ ബാറ്റിങ്ങില് ലഖ്നൗ ഉയര്ത്തിയ 228 റണ്സ് വിജയലക്ഷ്യം 18.4 ഓവറിലാണ് റോയല് ചലഞ്ചേഴ്സ് ബെംഗളൂരു മറികടന്നത്. താത്കാലിക നായകന് ജിതേഷ് ശര്മ്മയുടെ വെടിക്കെട്ട് ഇന്നിങ്സിന്റെ ബലത്തിലായിരുന്നു ആര്സിബിയുടെ വിജയം. ഇതോടെ പ്ലേഓഫില് ക്വാളിഫയര് 1 മത്സരത്തിനും അവര് യോഗ്യത നേടി.