ഐപിഎല്‍ 2025 സീസണില്‍ ശ്രദ്ധേയ പ്രകടനം കാഴ്ചവച്ച് ടി20യില്‍ വീണ്ടും തിളങ്ങിനില്‍ക്കുന്ന താരമാണ് കെഎല്‍ രാഹുല്‍. ഡല്‍ഹി ക്യാപിറ്റല്‍സിനായി ഈ വര്‍ഷം 13 ഇന്നിങ്‌സുകളില്‍ നിന്നായി 539 റണ്‍സാണ് രാഹുല്‍ നേടിയത്. 150 ആണ് കെഎലിന്റെ സ്‌ട്രൈക്ക് റേറ്റ്. സ്ഥിരതയാര്‍ന്ന പ്രകടനമാണ് ഡല്‍ഹിക്കായി കെഎല്‍ രാഹുല്‍ ഈ സീസണില്‍ കാഴ്ചവച്ചത്. ഐപിഎലിലെ പ്രകടനത്തിലൂടെ ടി20യില്‍ തന്റെ കാലം കഴിഞ്ഞിട്ടില്ല എന്ന് കാണിച്ചുതരുകയാണ് രാഹുല്‍. ഡല്‍ഹി പ്ലേഓഫില്‍ എത്താതെ പുറത്തായെങ്കിലും ഈ വര്‍ഷം അവരുടെ ടോപ് സ്‌കോറര്‍ ആയത് രാഹുലാണ്.
കഴിഞ്ഞ ലേലത്തിലാണ് ലഖ്‌നൗ സൂപ്പര്‍ ജയന്റ്‌സില്‍ നിന്നും രാഹുല്‍ ഡല്‍ഹി ടീമില്‍ എത്തിയത്. തന്നെ എഴുതിതളളിയവര്‍ക്കെല്ലാം വായടപ്പിക്കുന്ന മറുപടിയാണ് നിര്‍ണായക മത്സരങ്ങളിലെ ഇന്നിങ്‌സുകളിലൂടെ രാഹുല്‍ നല്‍കിയത്. ഐപിഎലില്‍ തിളങ്ങിയതോടെ അടുത്ത കൊല്ലം നടക്കാനിരിക്കുന്ന ടി20 ലോകകപ്പിനുളള ഇന്ത്യന്‍ ടീമില്‍ തന്റെ സ്ഥാനം ഉറപ്പിച്ചിരിക്കുകയാണ് രാഹുല്‍. യുവനിരയ്ക്കാണ് ഈ ഫോര്‍മാറ്റില്‍ ഇന്ത്യ പ്രാധാന്യം നല്‍കുന്നതെങ്കിലും ഒരങ്കത്തിന് കൂടിയുളള കരുത്ത് തനിക്കുണ്ടെന്ന് കെഎല്‍ രാഹുല്‍ പറയാതെ പറയുന്നു.
ഇംഗ്ലണ്ടിനെതിരായ ടെസ്റ്റ് പരമ്പരയ്ക്കുളള ഇന്ത്യന്‍ ടീമില്‍ കെഎല്‍ ഇടംനേടിയിരുന്നു. ഓപ്പണിങ് ബാറ്ററുടെ റോളിലാകും രാഹുല്‍ ഈ സീരിസിലും എത്തുക. ബോര്‍ഡര്‍ ഗവാസ്‌കര്‍ ട്രോഫിയില്‍ ഓസ്‌ട്രേലിയക്കെതിരെ ഓപ്പണിങ്ങില്‍ ഇറങ്ങി മികച്ച ബാറ്റിങ് പ്രകടനം കാഴ്ചവയ്ക്കാന്‍ രാഹുലിന് സാധിച്ചിരുന്നു. ഇതോടെയാണ് ഇന്ത്യയുടെ ഓപ്പണിങ് പൊസിഷനില്‍ രാഹുല്‍ തന്റെ സ്ഥാനം ഉറപ്പിച്ചത്.
