വിരാട് കോഹ്ലിയുടെ ശ്രീലങ്കൻ പര്യടനം മറ്റൊരു മോശം പ്രകടനത്തോടെ അവസാനിച്ചു. 249 എന്ന വിജയലക്ഷ്യത്തെ പിന്തുടർന്ന് ബാറ്റ് ചെയ്ത ഇന്ത്യക്ക് 26.1 ഓവർ പിന്നിട്ടപ്പോൾ 138 റൺസിന് കളി അവസാനിപ്പിക്കേണ്ടി വന്നു. ഇന്ത്യക്ക് വേണ്ടി ഏറ്റവും കൂടുതൽ റൺസ് നേടിയത് ക്യാപ്റ്റൻ രോഹിത് ശർമയാണ്. 20 പന്തിൽ നിന്നും 35 റൺസാണ് രോഹിത് നേടിയത്. വാഷിങ്ടൺ സുന്ദർ നേടിയ 25 പന്തിൽ 30 റൺസ് ഒഴിച്ച് നിർത്തിയാൽ വേറെ കാര്യമായ പ്രകടനങ്ങളൊന്നും ഉണ്ടായിട്ടില്ല. 18 പന്തിൽ കേവലം 20 റൺസാണ് വിരാട് കോഹ്ലിക്ക് നേടാനായത്. സീരീസിൽ ഏറെ നിരാശപ്പെടുത്തിയത് വിരാട് കോഹ്ലിയുടെ പ്രകടനമാണ് എന്ന് പറയേണ്ടി വരും. കേവലം 19.33 എന്ന ശരാശരിയിലാണ് വിരാട് കോഹ്ലി പരമ്പര അവസാനിപ്പിക്കുന്നത്.
അതേസമയം ബാറ്റ് ചെയ്യുന്നതിനിടെ ശ്രീലങ്കൻ ബൗളർ അസിത ഫെർണാണ്ടോയുമായി കോഹ്ലി വാക്ക് തർക്കത്തിൽ ഏർപ്പെട്ടു. ഇന്ത്യ ഉയർത്തിയ 249 റൺസ് വിജയലക്ഷ്യം പിന്തുടർന്നപ്പോൾ ഫെർണാണ്ടോയുടെ പന്തിൽ ബൗണ്ടറി പായിച്ചാണ് കോഹ്ലി തൻ്റെ ഇന്നിംഗ്സ് ആരംഭിച്ചത്. എന്നിരുന്നാലും, ഓവറിന്റെ അവസാന പന്തിൽ ഫോളോ ത്രൂ സമയത്ത് ഫെർണാണ്ടോ എന്തോ പറഞ്ഞപ്പോൾ കോഹ്ലി കലിപ്പായി. കോഹ്ലിയും താരവും തമ്മിൽ വാക്കുതകർക്കത്തിൽ ഏർപ്പെടുന്ന വീഡിയോ വൈറലായിരിക്കുകയാണ്.
എന്താണ് ഫെർണാണ്ടോ പറഞ്ഞതെന്ന് വിഡിയോയിൽ നിന്ന് വ്യക്തമല്ല. മത്സരശേഷം പക്ഷെ ഇരുവരും വഴക്കെല്ലാം മറന്ന് സന്തോഷത്തോടെയാണ് പിരിഞ്ഞത്. 2008ലെ അരങ്ങേറ്റ പരമ്പരയിൽ 31.80 ശരാശരി നേടിയത് മാത്രമാണ് ശ്രീലങ്കക്കെതിരെ 60 ശരാശരിയിൽ താഴെ കണക്കുള്ള കോഹ്ലിയുടെ ഒരേയൊരു സംഭവം.
എല്ലാ മത്സരങ്ങളിലും ടോസ് നഷ്ടപ്പെട്ട് രണ്ടാമതായി ബാറ്റ് ചെയ്യേണ്ടി വന്നത് ഇന്ത്യയെ ഒരു ഘട്ടത്തിലും സഹായിച്ചിട്ടില്ല. ഒരിക്കലും ഗൗതം ഗംഭീർ ആഗ്രഹിക്കുന്ന തരത്തിലുള്ള തുടക്കമല്ല ഇന്ത്യക്ക് ശ്രീലങ്കയിൽ ലഭിച്ചിരിക്കുന്നത് . ചാമ്പ്യൻസ് ട്രോഫിക്ക് മുമ്പ് 3 ഏകദിന മത്സരങ്ങൾ മാത്രം ബാക്കിയുള്ളപ്പോൾ, ടീമിനെ തിരഞ്ഞെടുക്കാൻ ഇന്ത്യ ടി20 ഫോമിനെ ആശ്രയിക്കാൻ നിർബന്ധിതരാകും എന്നതാണ് കൂടുതൽ സമ്മർദ്ദം കൊണ്ടുവരുന്ന ഘടകം.