ജിതേഷ് ശര്‍മ്മയുടെ വെടിക്കെട്ട് ബാറ്റിങ് മികവില്‍ അങ്ങനെ ആര്‍സിബി ക്വാളിഫയര്‍ 1 മത്സരത്തിന് യോഗ്യത നേടിയിരിക്കുകയാണ്. നാല് വിക്കറ്റുകള്‍ നഷ്ടപ്പെട്ട് ടീം പ്രതിസന്ധിയിലായ സമയം ക്രീസിലെത്തിയ ജിതേഷ് മായങ്ക് അഗര്‍വാളിനെ കൂട്ടുപിടിച്ച് ബെംഗളൂരുവിനെ വിജയതീരത്ത് എത്തിക്കുകയായിരുന്നു. 33 പന്തുകളില്‍ എട്ട് ഫോറും ആറ് സിക്‌സും ഉള്‍പ്പെടെ 85 റണ്‍സാണ് ജിതേഷ് ലഖ്‌നൗവിനെതിരെ അടിച്ചുകൂട്ടിയത്. ഒരറ്റത്ത് 23 പന്തില്‍ 41 റണ്‍സോടെ മായങ്ക് അഗര്‍വാള്‍ ജിതേഷിന് കാര്യമായ പിന്തുണ നല്‍കി.
മാച്ച് വിന്നിങ് ഇന്നിങ്‌സ് ആര്‍സിബിക്കായി കാഴ്ചവച്ചതോടെ സോഷ്യല്‍ മീഡിയയിലും വാര്‍ത്തകളിലും ഒന്നടങ്കം നിറയുകയാണ് ജിതേഷ് ശര്‍മ്മ. അതേസമയം വിരാട് കോഹ്ലി ഔട്ടായ ശേഷം തന്റെ മനസില്‍ തോന്നിയത് എന്തായിരുന്നുവെന്ന് പോസ്റ്റ് മാച്ച് പ്രസന്റേഷനില്‍ തുറന്നുപറഞ്ഞിരിക്കുകയാണ് ജിതേഷ്. “എനിക്ക് ഈ മാച്ച് വിന്നിങ് ഇന്നിങ്‌സ് കളിച്ചുവെന്ന് വിശ്വസിക്കാന്‍ കഴിയുന്നില്ലെന്ന് ജിതേഷ് ശര്‍മ്മ പറയുന്നു. വിരാട് ഭായ് പുറത്തായപ്പോള്‍, മത്സരം കുറച്ച് സീരിയസായി എടുക്കാന്‍ താന്‍ ചിന്തിച്ചിരുന്നു.
എന്റെ ഉപദേഷ്ടാവും ഗുരുവുമായ ദിനേശ് കാര്‍ത്തിക് പറയുന്നതുപോലെ, കളി കൂടുതല്‍ ആഴത്തില്‍ എടുക്കുക. എല്ലാ ഭാരവും എന്റെ മേലായിരുന്നതിനാല്‍ എനിക്ക് വേദന അനുഭവപ്പെടുന്നുണ്ടായിരുന്നു! വിരാട് ഭായ്, ക്രുണാല്‍ ഭായ്, ഭുവി ഭായ് എന്നിവര്‍ എന്നോടൊപ്പം ഉണ്ട്. അവരോടൊപ്പം കളിക്കുന്നത്‌ എനിക്ക് ആവേശമാണ്. ആ നിമിഷം ആസ്വദിക്കാന്‍ ഞങ്ങള്‍ ആഗ്രഹിക്കുന്നു. അടുത്ത മത്സരത്തില്‍ ഇതിലും മെച്ചപ്പെട്ട കളി പുറത്തെടുക്കാന്‍ ഞങ്ങള്‍ ശ്രമിക്കും, ജിതേഷ് ശര്‍മ്മ പറഞ്ഞുനിര്‍ത്തി.
