ലഖ്നൗ സൂപ്പര് ജയന്റ്സിനെതിരായ മാച്ച് വിന്നിങ് ഇന്നിങ്സോടെ എംഎസ് ധോണിയുടെ ഐപിഎല് റെക്കോഡ് മറികടന്ന് ആര്സിബിയുടെ ജിതേഷ് ശര്മ്മ. ആദ്യ ബാറ്റിങ്ങില് ലഖ്നൗ ഉയര്ത്തിയ 228 റണ്സ് വിജയലക്ഷ്യം നായകന് ജിതേഷിന്റെ അര്ധസെഞ്ച്വറിയുടെ പിന്ബലത്തില് 18,4 ഓവറില് മറികടക്കുകയായിരുന്നു ആര്സിബി. ഇന്നലത്തെ വിജയത്തോടെ പ്ലേഓഫില് ക്വാളിഫയര് 1 മത്സരത്തിനും അവര് യോഗ്യത നേടി. ക്വാളിഫയര് 1ല് പഞ്ചാബ് കിങ്സാണ് ബെംഗളൂരുവിന്റെ എതിരാളികള്.
33 പന്തില് 85 റണ്സാണ് ജിതേഷ് ശര്മ്മ ലഖ്നൗവിനെതിരെ അടിച്ചുകൂട്ടിയത്. എട്ട് ഫോറും ആറ് സിക്സും ഉള്പ്പെടുന്നതായിരുന്നു താരത്തിന്റെ ഇന്നിങ്സ്. ഇന്നലത്തെ മാച്ച് വിന്നിങ് ഇന്നിങ്സോടെ എംഎസ് ധോണി ആറാം നമ്പറില് ഇറങ്ങി നേടിയ റെക്കോഡാണ് ജിതേഷ് മറികടന്നത്. ഐപിഎല് റണ്ചേസില് ആറാം നമ്പറില് ഒരു താരം നേടിയ ഉയര്ന്ന സ്കോര് എന്ന റെക്കോഡാണ് ധോണിയെ മറികടന്ന് ജിതേഷ് സ്വന്തമാക്കിയത്.
2018ല് ബെംഗളൂരുവിനെതിരെ പുറത്താവാതെ 70 റണ്സാണ് ധോണി നേടിയിരുന്നത്. ഇത് ഇന്നലെ 85 റണ്സെടുത്ത് മറികടക്കുകയായിരുന്നു ജിതേഷ്. കൂടാതെ ഐപിഎല് ചരിത്രത്തില് ഇത് മൂന്നാം തവണയാണ് 200ന് മുകളില് ചേസ് ചെയ്ത് ബെംഗളൂരു വിജയിക്കുന്നത്. ഇതിനും കാരണക്കാരനായത് ജിതേഷാണ്. രജത് പാട്ടിധാറിന് പരിക്കേറ്റതിനെ തുടര്ന്നാണ് ജിതേഷ് ശര്മ്മ ആര്സിബിയുടെ താത്കാലിക നായകനായത്.