സൗത്താഫ്രിക്കക്ക് എതിരായ നാല് മത്സര പരമ്പരയിൽ ഇന്ന് നാലാം മത്സരത്തിലേക്ക് എത്തിയപ്പോൾ ഇത് ആദ്യമായിട്ടായിരുന്നു പരമ്പരയിൽ ഇന്ത്യക്ക് ടോസ് കിട്ടിയത്. ഇതുവരെയുള്ള മത്സരങ്ങളിൽ എല്ലാം ആദ്യം ബാറ്റിംഗ് ചെയ്യേണ്ടി വന്ന ഇന്ത്യ ടോസ് കിട്ടിയപ്പോൾ ബോളിങ് തിരഞ്ഞെടുക്കും എന്നാണ് കരുതിയത്. എന്നാൽ ഏവരെയും ഞെട്ടിച്ചുകൊണ്ട് തങ്ങൾക്ക് ബാറ്റിംഗ് തന്നെ മതിയെന്നും ആ വെല്ലുവിളി തങ്ങൾ ഇഷ്ടപെടുന്നു എന്നുമാണ് ഇന്ത്യൻ നായകൻ സൂര്യകുമാർ യാദവ് പറഞ്ഞത്. നായകൻ എന്താണോ പറഞ്ഞത് അത് അതേപടി അതിന്റെ പൂർണ സൗന്ദര്യത്തിൽ ആവർത്തിക്കുന്ന ഇന്ത്യൻ ബാറ്റർമാരെയാണ് ജോഹന്നാസ്ബർഗിൽ കാണാൻ സാധിച്ചത്.
ആദ്യ മത്സരത്തിൽ സെഞ്ച്വറി നേടിയ ശേഷം മങ്ങിയ സഞ്ജുവും കഴിഞ്ഞ മത്സരത്തിൽ മികവ് കാണിച്ച അഭിഷേകുമാണ് പതിവുപോലെ ഓപ്പണിങ് ഇറങ്ങിയത്. കഴിഞ്ഞ രണ്ട് മത്സരങ്ങളിൽ തന്നെ വീഴ്ത്തിയ ജാൻസനെതിരെ ശ്രദ്ധയോടെ തുടങ്ങിയ സഞ്ജു കോട്സിയ എറിഞ്ഞ തൊട്ടടുത്ത ഓവറിൽ തന്നെ ഗിയർ മാറ്റുന്ന കാഴ്ചയാണ് കാണാൻ സാധിച്ചത്. അഭിഷേകും ഫുൾ ഫ്ലോയിൽ തന്നെ തുടർന്നപ്പോൾ ബൗണ്ടറി മഴ പെയ്തിറങ്ങി തുടങ്ങി. ഏത് ബോളർ എന്നോ എറിയുന്ന ലെങ്ത് എന്നോ നോട്ടം ഇല്ലാതെ ഇരുവരും എതിരാളികളെ ആക്രമിച്ചു. ഇതിനിടയിൽ 18 പന്തിൽ 36 റൺ എടുത്ത അഭിഷേക് മടങ്ങി.
പോയതിനേക്കാൾ വലുത് ആണ് പിന്നെ വന്നത് എന്ന് പറയുന്ന പോലെയായിരുന്നു തിലകിന്റെ വരവ്. താൻ കഴിഞ്ഞ മത്സരത്തിൽ എവിടെ നിർത്തിയോ അവിടെ നിന്ന് തുടങ്ങിയ തിലക് സഞ്ജുവിനൊപ്പം ചേർന്നതോടെ പിന്നെ സിക്സ് മഴയാണ് കാണാൻ സാധിച്ചത്. സിംഗിൾ ഒകെ വല്ലപ്പോഴും മാത്രം സംഭവിക്കുന്ന കാഴ്ചയാണ് കാണാൻ സാധിച്ചത്. സഞ്ജുവും തിലകും മത്സരിച്ച് റൺ നേടിയതോടെ ബോളര്മാരുടെ അവസ്ഥ ബോളിങ് മെഷീനേക്കാൾ കഷ്ടമായി.
ആവനാഴിയിലെ മുഴുവൻ അസ്ത്രവും ഉപയോഗിച്ച സൗത്താഫ്രിക്കൻ നായകൻ മാർക്രം കാണികളെ കൊണ്ട് വരെ പന്തെറിയിപ്പിക്കാൻ തയാറായി നിൽക്കുന്ന രീതിയിലാണ് നിന്നത്. 27 സിക്സുകൾ ഇപ്പോൾ തന്നെ പിറന്ന ഇന്നിങ്സിൽ ഒടുവിൽ വിവരം കിട്ടുമ്പോൾ ഇന്ത്യ 253- 1 എന്ന നിലയിലാണ്. പരമ്പരയിലെ രണ്ടാമത്തെ സെഞ്ച്വറി പൂർത്തിയാക്കിയ ഇരുതാരങ്ങളും പോരാട്ടം തുടരുകയാണ്. സഞ്ജു 100 റൺ നേടി നിൽക്കുമ്പോൾ തിലക് വർമ്മ 100റൺ നേടി നിൽക്കുന്നു.