ഇന്ത്യയുടെ ദക്ഷിണാഫ്രിക്കന്‍ പര്യടനത്തിനിടെ വിശ്രമം ആവശ്യപ്പെട്ട് ടീമില്‍നിന്ന് പോയതാണ് വിക്കറ്റ് കീപ്പര്‍ ബാറ്റര്‍ ഇഷാന് കിഷന്‍. അതിനു ശേഷം താരത്തെ സംബന്ധിച്ച് വലിയ വിവരങ്ങളൊന്നുമില്ല. ഇപ്പോഴിതാ താരം ദക്ഷിണാഫ്രിക്കന്‍ പര്യടനം പാതിവഴിയില്‍ ഉപേക്ഷിച്ചുപോയതിന്റെ കാരണം പുറത്തുവന്നിരിക്കുകയാണ്.
ദക്ഷിണാഫ്രിക്കയ്ക്കെതിരായ ടി20 പരമ്പരയ്ക്കുള്ള ടീമില്‍ ജിതേഷ് ശര്‍മ്മയെ സെലക്ടര്‍മാര്‍ ഉള്‍പ്പെടുത്തിയതില്‍ അതൃപ്തി പ്രകടിപ്പിച്ചാണ് ഇഷാന് കിഷന്‍ ദക്ഷിണാഫ്രിക്കന്‍ പര്യടനം പാതിവഴിയില്‍ ഉപേക്ഷിച്ചതെന്നാണ് റിപ്പോര്‍ട്ട്. ദക്ഷിണാഫ്രിക്കയിലെ ടെസ്റ്റ് പരമ്പരയില്‍നിന്നും വിട്ടുനില്‍ക്കാനുള്ള അദ്ദേഹത്തിന്റെ തീരുമാനത്തില്‍ ഈ അതൃപ്തി ഒരു പങ്കുവഹിച്ചിരിക്കാം.
ടീമിനോടൊപ്പമുള്ള നിരന്തരമായ യാത്രകളും അവസരമില്ലായ്മയും മൂലമുള്ള മാനസിക സംഘര്‍ഷമാണ് വിട്ടുനില്‍ക്കാനുള്ള കാരണമായി ഇഷാന് വ്യക്തമാക്കിയിരുന്നത്. എന്നാല്‍ കെ.എല്‍ രാഹുലിന്റെ പരിക്കും കെ.എസ് ഭരത് വളരെ മോശം ഫോമിലായിരുന്നിട്ടും ടെസ്റ്റ് ടീമില്‍ തുടരുന്നതും കൂട്ടിവായിക്കുമ്പോള്‍ ഇഷാന് കിഷന്‍ ടീമിലേക്ക് വരേണ്ടത് തന്നെയാണ്. അത് സംഭവിക്കുന്നില്ലെങ്കില്‍ പ്രശ്‌നം ഗുരുതരമാണെന്ന് തന്നെ കരുതണം.
ഇഷാന് ഇനി ഒരു തിരിച്ചുവരവ് വേണമെങ്കില്‍ ക്രിക്കറ്റ് കളിക്കണമെന്ന് ടീം മുഖ്യ പരിശീലകന്‍ രാഹുല്‍ ദ്രാവിഡ് ആവശ്യപ്പെട്ടിരുന്നു. അദ്ദേഹം വിശ്രമം ആവശ്യപ്പെട്ടതാണെന്നും വിശ്രമം നല്‍കുന്നതില്‍ തങ്ങള്‍ക്ക് സന്തോഷമുണ്ടായിരുന്നെന്നും ദ്രാവിഡ് പറഞ്ഞു. ആര്‍ക്കും തിരിച്ചുവരാം. ഇഷാന് ആഭ്യന്തര ക്രിക്കറ്റ് കളിച്ച് തിരിച്ചുവരണമെന്ന് പറഞ്ഞിട്ടില്ല. കുറച്ച് ക്രിക്കറ്റ് കളിക്കണമെന്നാണ് പറഞ്ഞത്. അദ്ദേഹത്തിന് തിരഞ്ഞെടുക്കാം. ഇഷാന്റെ മേല്‍ ഒരു സമ്മര്‍ദവും ചെലുത്തിയിട്ടില്ലെന്നും ദ്രാവിഡ് പറഞ്ഞു.