വ്യാഴാഴ്ച നടന്ന രാജസ്ഥാൻ റോയൽസും മുംബൈ ഇന്ത്യൻസും തമ്മിലുള്ള പോരാട്ടത്തിൽ മുംബൈ ഇന്ത്യൻസ് രാജസ്ഥാനെ 100 റൺസിന് തോൽപ്പിച്ചതോടെ അവർ പ്ലേ ഓഫ് ഏകദേശം ഉറപ്പിക്കുന്ന അവസ്ഥയിൽ കാര്യങ്ങൾ എത്തിയിരിക്കുകയാണ്. തോറ്റെങ്കിലും, മത്സരശേഷം രാജസ്ഥാൻ റോയൽസിന്റെ ഫാസ്റ്റ് ബൗളർ ആകാശ് മധ്വാളിന്റെ രീതികൾ ആരാധകരെ ആകർഷിച്ചിരിക്കുകയാണ്.
കളി അവസാനിച്ചപ്പോൾ, ആകാശ് മുൻ മുംബൈ ക്യാപ്റ്റൻ രോഹിത് ശർമ്മയെ സമീപിച്ച് അഭിവാദ്യം ചെയ്തു. ഇവർ സംസാരിച്ചുകൊണ്ടിരുന്നപ്പോൾ രോഹിത് ഭാര്യ, റിതികയെ കാണിച്ചപ്പോൾ ആകാശ് അവരെ നോക്കി കൈകൂപ്പി നമസ്കാരം പറയുക ആയിരുന്നു. ” ഇതൊന്നും പണം കൊടുത്താൽ കിട്ടില്ല” എന്ന് പറഞ്ഞാണ് മുംബൈ ആരാധകർ ആകാശിന്റെ പെരുമാറ്റത്തെ ആഘോഷിക്കുന്നത്.
വലംകൈയ്യൻ ഫാസ്റ്റ് ബൗളറായ ആകാശ് മധ്വാൾ 2023 ൽ രോഹിത് ശർമ്മയുടെ നേതൃത്വത്തിൽ മുംബൈ ഇന്ത്യൻസിനായി ഐപിഎല്ലിൽ അരങ്ങേറ്റം കുറിക്കുക ആയിരുന്നു. ഈ വർഷം രാജസ്ഥാൻ റോയൽസ് ₹1.2 കോടിക്ക് വാങ്ങുന്നതിന് മുമ്പ് ഫ്രാഞ്ചൈസിക്ക് വേണ്ടി രണ്ട് സീസണുകൾ കളിച്ചു.
രസകരമെന്നു പറയട്ടെ, സീസണിൽ ഇന്നലെ ആയിരുന്നു താരത്തിന് ആദ്യ അവസരം കിട്ടിയത്. അദ്ദേഹത്തിന്റെ ബൗളിംഗ് പ്രകടനം മികച്ചതായിരുന്നു, എങ്കിലും ഒരു വിക്കറ്റ് പോലും വീഴ്ത്താൻ അദ്ദേഹത്തിന് കഴിഞ്ഞില്ല.