മിച്ചൽ മാർഷിന്റെ ഐപിഎൽ കന്നി സെഞ്ച്വറി മികവിൽ , ഗുജറാത്ത് ടൈറ്റൻസിനെതിരെ വ്യാഴാഴ്ച അഹമ്മദാബാദിൽ 33 റൺസിന്റെ വിജയത്തോടെ ലഖ്നൗ സൂപ്പർ ജയന്റ്സ് തുടർച്ചയായ നാല് മത്സരങ്ങളുടെ തോൽവിയിൽ നിന്ന് കരകയറി ആശ്വാസ ജയം സ്വന്തമാക്കി. എന്നാൽ മത്സരം മാർഷിനും ലഖ്നൗവിനും നല്ല ഓർമ്മകൾ സമ്മാനിച്ചു എങ്കിലും, മത്സരത്തിന് ശേഷമുള്ള ശുഭ്മാൻ ഗില്ലും ഋഷഭ് പന്തും തമ്മിലുള്ള സംസാര രീതികൾ സോഷ്യൽ മീഡിയയിൽ ചർച്ചയായി.
ഏതാനും നിമിഷങ്ങൾ മാത്രം നീണ്ടുനിന്ന സംഭവത്തിൽ, പതിവ് ഹസ്തദാനം നടത്തുന്നതിനിടെ പരാജയപ്പെട്ട സങ്കടത്തിൽ ഇറങ്ങി വന്ന ഗിൽ പന്തിനെ നൈസായി ഒഴിവാക്കുക ആയിരുന്നു എന്ന് വിഡിയോയിൽ നിന്ന് വ്യക്തമാണ്. കൈ കൊടുത്ത ശേഷം ഇന്ത്യൻ ടീമിലെ തന്റെ സഹതാരത്തോട് സംസാരിക്കാൻ തുടങ്ങിയ പന്തിനെ കേൾക്കാതെ ഗിൽ മുന്നോട്ട് പോകുന്ന വീഡിയോ ഇപ്പോൾ ചർച്ചയാകുന്നു.
എന്തിനാണ് ഇത്ര അഹങ്കാരം, പന്തിനോടുള്ള പെരുമാറ്റം ശരിയായില്ല, തുടങ്ങി നിരവധി അഭിപ്രായങ്ങളും ഇപ്പോൾ വരുന്നുണ്ട്. എന്തായാലും ഈ ഇന്ത്യൻ പ്രീമിയർ ലീഗിൽ തകർപ്പൻ ഫോമിൽ കളിക്കുന്ന ഗിൽ ഇന്നലെയും ഭേദപ്പെട്ട പ്രകടനമാണ് നടത്തിയത്. അതേസമയം പന്ത് സീസണിൽ ഉടനീളം നിരാശപ്പെടുത്തി എങ്കിലും ഇന്നലെ ലക്നൗ ബാറ്റിംഗിൽ ഫിനിഷിങ് സംഭാവന നൽകി തിളങ്ങി.
ഇന്ത്യൻ ടെസ്റ്റ് ടീം നായകൻ ആകാൻ ഗില്ലിനൊപ്പം മത്സരിക്കുന്ന പ്രധാന താരം പന്ത് ആണ് എന്നുള്ളതും ശ്രദ്ധിക്കണം.