ഐപിഎല് 17ാം സീസണില് ആരാധകര് മുഴുവന് ആകാംക്ഷയോടെ ഉറ്റുനോക്കുന്ന താരങ്ങളിലൊരാളാണ് ഇന്ത്യന് യുവ ബാറ്റര് യശസ്വി ജയ്സ്വാള്. ഐപിഎലില് ഇത്തവണ താരം എത്ര റണ്ണെടുക്കുമെന്നു പ്രവചിച്ചിരിക്കുകയാണ് ദക്ഷിണാഫ്രിക്കന് ബാറ്റിംഗ് ഇതിഹാസം എബി ഡിവില്ലിയേഴ്സ്. ഏറ്റവും കുറഞ്ഞത് 500ന് മുകളില് റണ്സെങ്കിലും താരത്തില്നിന്നും പ്രതീക്ഷിക്കാമെന്നാണ് ഡിവില്ലിയേഴ്സ് പറയുന്നത്.
എനിക്കു ഇനിയും കാത്തിരിക്കാന് സാധിക്കാത്ത ഒരാളുണ്ട്, അത് ജയ്സ്വാളാണ്. തന്നെക്കൊണ്ട് എന്തൊക്കെ സാധിക്കുമെന്നു ടെസ്റ്റ് പരമ്പരയില് അവന് കാണിച്ചുകഴിഞ്ഞു. ഇനി ടി20യിലും തന്റെ പ്രതിഭ പുറത്തെടുക്കാനുള്ള ജയ്സ്വാളിന്റെ സമയമാണിത്. ടെസ്റ്റ് പരമ്പരയിലെ പ്രകടനത്തോടെ വലിയ ആത്മവിശ്വാസമായിരിക്കും അവനു ലഭിച്ചിട്ടുണ്ടാവുക. അതു ഐപിഎല്ലിലേക്കും കൊണ്ടുവരാനായിരിക്കും ഇനിയുള്ള ശ്രമം.
ജയ്സ്വാളില് നിന്നും വെടിക്കെട്ട് തന്നെയാണ് ഞാന് പ്രതീക്ഷിക്കുന്നത്. ഏറ്റവും കുറഞ്ഞത് 500 പ്ലസ് റണ്സെങ്കിലും അവനില് നിന്നു ഞാന് പ്രതീക്ഷിക്കുകയാണ്. ചിലപ്പോള് 600 പ്ലസ് റണ്സും ജയ്സ്വാള് സ്കോര് ചെയ്തേക്കും- ഡിവില്ലിയേഴ്സ് പറഞ്ഞു.
ഇംഗ്ലണ്ടിനെതിരായി അവസാനിച്ച ടെസ്റ്റ് പരമ്പരയില് ഗംഭീര പ്രകടനമാണ് യുവതാരം കാഴ്ചവെച്ചത്. ഒമ്പതു ഇന്നിംഗ്സുകളില് നിന്നും രണ്ടു ഡബിള് സെഞ്ച്വറികളടക്കം 712 റണ്സ് താരം നേടി. കഴിഞ്ഞ ഐപിഎലില് 14 മല്സരങ്ങളില് നിന്നും 163.61 സ്ട്രൈക്ക് റേറ്റില് ഒരു സെഞ്ച്വറിയും അഞ്ചു ഫിഫ്റ്റികളുമടക്കം 625 റണ്സായിരുന്നു താരത്തിന്റെ സമ്പാദ്യം.