ചെന്നൈ സൂപ്പര്‍ കിംഗ്‌സ് ലഖ്‌നൗ സൂപ്പര്‍ ജയന്റ്‌സ് മത്സരത്തില്‍ സംഭവിച്ച രസകരമായ ഒരു സംഭവം സോഷ്യല്‍ മീഡിയയില്‍ വൈറലാകുന്നു. ലഖ്‌നൗവിന്റെ ഇന്നിംഗ്‌സില്‍ സൂപ്പര്‍ ബാറ്റര്‍ മാര്‍ക്കസ് സ്റ്റോയ്‌നിസിനെ രവീന്ദ്ര ജഡേജ പുറത്താക്കിയതിന്റെ വീഡിയോയാണ് ഐപിഎല്‍ പ്രേമികളെ ത്രസിപ്പിച്ചിരിക്കുന്നത്.
ലഖ്‌നൗ ഇന്നിംഗ്‌സിന്റെ ഏഴാം ഓവറിലാണ് സംഭവം. ക്രീസില്‍ മാര്‍ക്കസ് സ്റ്റോയിനിസ്. ബോള്‍ ജഡേജയുടെ കൈയില്‍. ഓവറിലെ അഞ്ചാമത്തെ പന്ത് സ്റ്റോയിനിസ് സ്‌ട്രൈറ്റ് ഡ്രൈവ് ചെയ്യാന്‍ ശ്രമിച്ചു. പന്ത് ഒരിക്കലും പ്രതീക്ഷിക്കാത്ത രീതിയില്‍ ടേണ്‍ ചെയ്തു സ്റ്റോയിനിസിന്റെ സ്റ്റമ്പ് തെറിപ്പിച്ചു.
എന്താണ് സംഭവിച്ചത് എന്ന് മനസിലാകാതെ സ്റ്റോയിനിസ് കണ്ണുമിഴിച്ചു. ചെന്നൈ താരങ്ങള്‍ വിക്കറ്റ് ആഘോഷിക്കുമ്പോഴും എന്താണ് സംഭവിച്ചത് എന്ന് മനസിലാകാതെ സ്റ്റോയിനിസ് ക്രീസില്‍ നില്‍ക്കുകയായിരുന്നു. ഈ വീഡിയോ ഇതിനോടകം വൈറലായി കഴിഞ്ഞു.
മത്സരത്തില്‍ കനത്ത ബാറ്റിംഗ് തകര്‍ച്ചയാണ് ലഖ്‌നൗ നേരിട്ടത്. മഴ കളി മുടക്കുമ്പോള്‍ 19.2 ഓവറില്‍ ഏഴ് വിക്കറ്റ് നഷ്ടത്തില്‍ 125 റണ്‍സ് എന്ന നിലയിലാണ്. അര്‍ദ്ധ സെഞ്ച്വറി നേടിയ ആയുഷ് ബഡോണിയുടെ പ്രകടനമാണ്(59*) ലഖ്‌നൗവിനെ വന്‍നാണക്കേടില്‍നിന്നും രക്ഷിച്ചത്.