ചെന്നൈ നായകന്‍ എംഎസ് ധോണി ബാറ്റിംഗില്‍ ബുദ്ധിമുട്ടുന്നത് കാണുന്നത് ഏറെ സങ്കടകരമാണെന്ന് ഇന്ത്യന്‍ മുന്‍ താരം ഇര്‍ഫാന്‍ പത്താന്‍. പഞ്ചാബ് കിംഗ്‌സിനെതിരെ ഇന്നലെ നടന്ന മത്സരത്തില്‍ ധോണി ഗൂഗ്ലിയില്‍ പുറത്തായത് ചൂണ്ടിക്കാട്ടിയാണ് ഇര്‍ഫാന്റെ പ്രതികരണം. രവി ബിഷ്നോയിയുടെ ഗൂഗ്ലിയിലാണ് ധോണി പുറത്തായത്.
‘ഫാസ്റ്റ് ബോളേഴ്സിന് എതിരെയാണ് ധോണി ഇങ്ങനെ പുറത്താവുന്നത് എങ്കില്‍ അത് നമുക്ക് മനസ്സിലാക്കാം. എന്നാല്‍ ഇവിടെ ഗൂഗ്ലി വായിക്കാന്‍ ധോണിക്ക് കഴിയാതെ വന്നു. ധോണി ആ പിഴവ് തുടരെ ആവര്‍ത്തിക്കുന്നു. ഇത് ആദ്യമായി സംഭവിക്കുന്നതല്ല. വരുണ്‍ ചക്രവര്‍ത്തിയുടെ ഗൂഗ്ലിയിലും ധോണി പുറത്തായിരുന്നു.’
‘സ്റ്റമ്പിന് നേര്‍ക്ക് പന്ത് വരുമ്പോള്‍ കൈകള്‍ ഫ്രീയാക്കാന്‍ ധോണിക്ക് കഴിയുന്നില്ല. അവിടെയാണ് പ്രശ്നം. ഇവിടെ ഓഫ് സ്റ്റമ്പിന് പുറത്തായാണ് പന്ത് എത്തുന്നത്. ഇന്‍സൈഡ് എഡ്ജ് ആയി. ബോട്ടം ഹാന്‍ഡില്‍ കളിക്കുമ്പോഴാണ് അത് സംഭവിക്കുക’ ഇര്‍ഫാന്‍ പറഞ്ഞു.
ഈ സീസണില്‍ ക്യാപ്റ്റന്‍സിയില്‍ ധോണി മികച്ചു നില്‍ക്കുപ്പോള്‍ ബാറ്റിംഗില്‍ സമ്പൂര്‍ണ പരാജയമാണ്. 14 മത്സരങ്ങളില്‍ 96 റണ്‍സ് മാത്രമാണ് ധോണിയ്ക്ക് ഇതുവരെ നേടാനായിട്ടുള്ളത്.