ഐ.പി.എല്ലില്‍ മുംബൈ ഇന്ത്യന്‍സിനെതിരെ കഴിഞ്ഞ ദിവസം നടന്ന മത്സരത്തില്‍ അര്‍ദ്ധസെഞ്ച്വറി പൂര്‍ത്തിയാക്കിയ ഉടന്‍ രാജസ്ഥാന്റെ മലയാളി താരം സഞ്ജു സാംസണ്‍ അത് ആഘോഷിച്ചത് മസില്‍ പെരുപ്പിച്ച് കാണിച്ചായിരുന്നു. ഇപ്പോഴിതാ അത്തരമൊരു വ്യത്യസ്തമായ ആഘോഷത്തിന് കാരണമെന്തെന്ന് തുറന്നു പറഞ്ഞിരിക്കുകയാണ് സഞ്ജു.
“അര്‍ദ്ധസെഞ്ച്വറി പൂര്‍ത്തിയാക്കിയപ്പോള്‍ അത്തരത്തില്‍ ആഘോഷിച്ചത് എന്റെ പേര് എന്നെത്തന്നെ ഒന്ന് ഓര്‍മ്മിപ്പിക്കാനാണ്. ലോകം കണ്ട ഏറ്റവും കരുത്തനായ മനുഷ്യനാണ് സാംസണ്‍. അക്കാര്യം ഞാന്‍ കൂടെക്കൂടെ എന്നെത്തന്നെ ഓര്‍മ്മിപ്പിക്കാറുണ്ട്. ഞാന്‍ വളരെ കരുത്തനാണെന്നും കൂടുതല്‍ സിക്‌സറുകള്‍ ഇനിയും നേടാനാകുമെന്നും സ്വയം ഓര്‍മ്മിപ്പിക്കും”
“എന്നിലുള്ള വിശ്വാസം ഞാന്‍ ഒരിക്കലും കൈവിട്ടിരുന്നില്ല. തുടര്‍ച്ചയായി 14 മത്സരങ്ങള്‍ കളിക്കുമ്പോള്‍ ഉയര്‍ച്ചതാഴ്ചകള്‍ സ്വാഭാവികമാണ്. കളിയോടുള്ള സമീപനത്തില്‍ ഞാന്‍ ചെറിയ മാറ്റം വരുത്തിയിരുന്നു. വലിയ ഗ്രൗണ്ടുകളിലും വ്യത്യസ്തമായ വിക്കറ്റുകളിലും നിലയുറപ്പിക്കാന്‍ കൂടുതല്‍ സമയം വേണ്ടിവരും. അതാണ് ഞാന്‍ വരുത്തിയ മാറ്റം. സിക്‌സടിക്കാന്‍ എനിക്ക് പ്രത്യേകിച്ച് രീതികളൊന്നുമില്ല. പന്ത് ശ്രദ്ധിക്കുക, അടിക്കുക. അത്രതന്നെ” സഞ്ജു പറഞ്ഞു.
ഈ സീസണില്‍ സിക്‌സ് നേട്ടത്തില്‍ ഒന്നാം സ്ഥാനത്താണ് സാംസണ്‍. 12 മത്സരങ്ങളില്‍നിന്ന് ഇതുവരെ 23 സിക്‌സറുകളാണ് സഞ്ജുവിന്റെ പേരിലുള്ളത്. 11 കളികളില്‍നിന്ന് 22 സിക്‌സറുമായി പഞ്ചാബിന്റെ വിന്‍ഡീസ് താരം നിക്കോളാസ് പൂരാനാണ് രണ്ടാമത്.