ഈ തലമുറയിലെ ഏറ്റവും മികച്ച താരങ്ങളായ എം.എസ്. ധോണിയും വിരാട് കോഹ്ലിയും ക്രിക്കറ്റിനും അപ്പുറം ഒരു വലിയ സൗഹൃദം പങ്കിടുന്നു എന്നുള്ളത് ഏവർക്കും അറിവുള്ള കാര്യമാണ്. ‘ക്യാപ്റ്റൻ’ ധോണിയുടെ കീഴിലാണ് കോഹ്ലി അരങ്ങേറ്റം കുറിച്ചത്, അദ്ദേഹത്തിന്റെ നേതൃത്വത്തിൽ ആണ് പല വമ്പൻ റെക്കോഡുകളും കോഹ്ലി ഈ കാലഘട്ടത്തിൽ എല്ലാം സ്വന്തമാക്കിയതും. ഇരുവരും വളരെക്കാലം ഇന്ത്യൻ പ്രീമിയർ ലീഗ് (ഐപിഎൽ) ഫ്രാഞ്ചൈസികളെ നയിച്ചിട്ടുമുണ്ട്. പക്ഷേ 2025 സീസണിലേക്ക് വരുമ്പോൾ ഇരുവരും നിൽക്കുന്നത് അവരുടെ ചുമലിൽ നേതൃത്വഭാരമില്ലാതെയാണ്.
അതിനിടെ അപ്രതീക്ഷിതമായി വിരാട് കോഹ്ലി ടെസ്റ്റ് ഫോർമാറ്റിൽ നിന്നും വിരമിക്കൽ പ്രഖ്യാപിക്കുയും ചെയ്തത് ഈ ഇന്ത്യൻ പ്രീമിയർ ലീഗിന്റെ ഇടവേളയിലാണ്. മുമ്പൊരിക്കൽ ഇരുവരും ഇന്ത്യൻ ടീമിൽ കളിച്ചിരുന്ന കാലത്ത് കോഹ്ലി മോശം ഫോമിൽ നിൽക്കുമ്പോൾ അദ്ദേഹത്തെ പുറത്താക്കാനുള്ള ചർച്ചകൾ നടക്കുകയും അതിൽ അസ്വസ്ഥനായ ധോണി അദ്ദേഹത്തെ ടീമിൽ നിന്ന് ഒഴിവാക്കാനുള്ള സകല പ്ലാനുകളും പൊളിക്കുകയും ചെയ്തു.
2011 ലെ ഓസ്ട്രേലിയൻ പര്യടനത്തിൽ കോഹ്ലിയെ ടീമിൽ നിന്ന് ഒഴിവാക്കണമെന്ന് മൊഹീന്ദർ അമർനാഥ് (മുൻ ബിസിസിഐ ചീഫ് സെലക്ടർ) ധോണിയോട് ആവശ്യപ്പെട്ടിരുന്നു. ആ പര്യടനത്തിൽ കോഹ്ലി രണ്ട് ടെസ്റ്റുകളിൽ പരാജയപ്പെട്ടതിന്റെ അടിസ്ഥാനത്തിൽ ആയിരുന്നു അത്. അപ്പോൾ ധോണി ഇങ്ങനെ പറഞ്ഞു ‘ഞാൻ കോഹ്ലിയെ ടീമിൽ നിന്ന് ഒഴിവാക്കില്ല. നിങ്ങൾക്ക് ആരെയെങ്കിലും ടീമിൽ നിന്ന് ഒഴിവാക്കണമെങ്കിൽ, ആരെയെങ്കിലും ടീമിൽ നിന്ന് ഒഴിവാക്കുക, കാരണം 2016, 2018, 2020 വർഷങ്ങളിൽ ഇന്ത്യയെ പ്രതിനിധീകരിക്കാൻ ഇപ്പോൾ ഒരു സീനിയർ താരവും ഉണ്ടാകില്ല, പക്ഷേ കോഹ്ലി അവിടെ ഉണ്ടാകും”
എന്തായാലും ധോണി അന്ന് പറഞ്ഞത് പോലെ ടീമിൽ ഉണ്ടായിരുന്ന പല സീനിയർ താരങ്ങൾ ഈ കാലയളവിൽ ടീം വിട്ടപ്പോൾ കോഹ്ലി ടീമിന്റെ നട്ടെല്ലായി ഈ നാളുകളിൽ നിലകൊണ്ടു.