പാകിസ്ഥാന്‍ ടീം നായകന് ബാബര്‍ അസമിന്റെ ടി20 ഐ ബാറ്റിംഗിനെ പരിഹസിച്ച് പാക് മുന്‍ പേസര്‍ മുഹമ്മദ് ആസിഫ്. പാക് നായകനെതിരെ ഇന്നും തനിക്ക് മെയ്ഡന്‍ ഓവര്‍ എറിയാന്‍ കഴിയുമെന്ന് മുഹമ്മദ് ആസിഫ് അവകാശപ്പെട്ടു.
‘ടി20 ക്രിക്കറ്റില്‍ ഇന്നും ബാബര്‍ അസമിനെതിരെ ഒരു മെയ്ഡന്‍ ഓവര്‍ എറിയാന്‍ എനിക്ക് കഴിയും. നിങ്ങള്‍ മികച്ച പന്തുകള്‍ എറിഞ്ഞാല്‍ അദ്ദേഹത്തിന് പന്ത് തൊടാന്‍ കഴിയില്ല’ മുഹമ്മദ് ആസിഫ് പറഞ്ഞു.
എക്സ് സ്പെയ്സില്‍ സംസാരിക്കവെയാണ് ആസിഫ് പാകിസ്ഥാന്‍ ക്യാപ്റ്റനെ കുറിച്ച് വിവാദ പ്രസ്താവന നടത്തിയത്. 2023ലെ ഏഷ്യാ കപ്പ് നിലവിലെ ലോക ഒന്നാം നമ്പര്‍ ഏകദിന ബാറ്ററായ ബാബര്‍ അസമിന് നിരാശാജനകമായിരുന്നു. ഇന്ത്യ, ശ്രീലങ്കയ്ക്കെതിരായ വലിയ മത്സരങ്ങളില്‍ പാകിസ്ഥാന്‍ നായകന് മികച്ച സംഭാവന നല്‍കാന്‍ കഴിഞ്ഞില്ല.
ഏഷ്യാ കപ്പില്‍ നേപ്പാളിനെതിരെ 151 റണ്‍സ് അടിച്ചുകൂട്ടിയാണ് അസം തുടക്കം കുറിച്ചത്. എന്നിരുന്നാലും, ടൂര്‍ണമെന്റ് പുരോഗമിക്കുമ്പോള്‍, അദ്ദേഹത്തിന്റെ പ്രകടനത്തില്‍ കുറവുണ്ടായി. സൂപ്പര്‍ 4 ഘട്ടത്തില്‍, ബംഗ്ലാദേശ്, ഇന്ത്യ, ശ്രീലങ്ക എന്നിവയ്ക്കെതിരെ യഥാക്രമം 17, 10, 29 റണ്‍സ് മാത്രമേ അദ്ദേഹത്തിന് നേടാനായുള്ളൂ. ഇത് പാകിസ്ഥാന്റെ പുറത്താകലിലേക്കും നയിച്ചു.