സിംബാബ്വെയ്ക്കെതിരെ വിയാൻ മുൾഡർ ട്രിപ്പിൾ സെഞ്ച്വറി നേടി. പക്ഷേ വിൻഡീസ് ഇതിഹാസം ബ്രയാൻ ലാറയുടെ ടെസ്റ്റ് ക്രിക്കറ്റിലെ ഏറ്റവും ഉയർന്ന വ്യക്തിഗത സ്കോർ എന്ന ലോക റെക്കോർഡ് തകർക്കാൻ മുൾഡർ താൽപ്പര്യപ്പെട്ടില്ല. രണ്ടാം ടെസ്റ്റിൽ 367 റൺസ് നേടി പുറത്താകാതെ നിന്ന അദ്ദേഹം, 21 വർഷം മുമ്പ് ലാറ നേടിയ 400 നോട്ടൗട്ട് എന്ന സ്കോറിന് 33 റൺസ് മാത്രം അകലെയായിരുന്നു. പക്ഷേ താരം മാരത്തൺ ഇന്നിംഗ്സ് നിർത്തി ദക്ഷിണാഫ്രിക്കയെ 626-5 എന്ന നിലയിൽ ഡിക്ലയർ ചെയ്തു.
“ആദ്യം, ഞങ്ങൾക്ക് മതിയെന്ന് ഞാൻ കരുതി, ഞങ്ങൾ ബൗൾ ചെയ്യേണ്ടതുണ്ട്. രണ്ടാമതായി, ബ്രയാൻ ലാറ ഒരു ഇതിഹാസമാണ്, ഇംഗ്ലണ്ടിനെതിരെ അദ്ദേഹം 400 റൺസ് നേടി. ആ പദവിയിലുള്ള ഒരാൾക്ക് ആ റെക്കോർഡ് നിലനിർത്താൻ കഴിയുന്നത് വളരെ സവിശേഷമാണ്. എനിക്ക് വീണ്ടും ഒരു അവസരം ലഭിച്ചാൽ ഞാൻ അത് തന്നെ ചെയ്യും.
ഞാൻ ഷുക്സിനോട് (പ്രോട്ടീസ് പരിശീലകൻ ശുക്രി കോൺറാഡ്) സംസാരിക്കുകയായിരുന്നു, അദ്ദേഹം എന്നോട് പറഞ്ഞു, ‘ഇതിഹാസങ്ങൾ വലിയ സ്കോറുകൾ നിലനിർത്തട്ടെ’. എന്റെ വിധി എന്താണെന്നോ എനിക്ക് എന്താണ് വിധിച്ചിരിക്കുന്നതെന്നോ നിങ്ങൾക്കറിയില്ല. പക്ഷേ ബ്രയാൻ ലാറ ആ റെക്കോർഡ് നിലനിർത്തുന്നത് അത് അങ്ങനെ തന്നെയായിരിക്കണം,” അദ്ദേഹം കൂട്ടിച്ചേർത്തു.
സിംബാബ്വെയ്ക്കെതിരായ രണ്ടാം ടെസ്റ്റിൽ ദക്ഷിണാഫ്രിക്കയുടെ നായക സ്ഥാനം വിയാൻ മുൾഡറിനായിരുന്നു. അപ്രതീക്ഷിതമായ ഉത്തരവാദിത്തം ഉണ്ടായിരുന്നിട്ടും, മുൾഡർ അവസരത്തിനൊത്ത് ഉയർന്നുവന്ന് ടെസ്റ്റ് ക്യാപ്റ്റൻസിയിൽ അരങ്ങേറ്റത്തിൽ ഒരു ബാറ്റർ നേടുന്ന ഏറ്റവും ഉയർന്ന സ്കോർ എന്ന റെക്കോർഡ് സൃഷ്ടിച്ചു. ബുലവായോയിൽ നടന്ന മത്സരത്തിന്റെ രണ്ടാം ദിവസമാണ് മുൾഡർ ഈ അവിശ്വസനീയ നേട്ടം കൈവരിച്ചത്.
1968-ൽ ക്രൈസ്റ്റ്ചർച്ചിൽ ഇന്ത്യയ്ക്കെതിരെ തന്റെ ആദ്യ ഇന്നിംഗ്സിൽ 239 റൺസ് നേടിയ ന്യൂസിലൻഡിന്റെ ഗ്രഹാം ഡൗളിംഗിനെയാണ് മുൾഡർ ഇവിടെ മറികടന്നത്. ടോസ് നഷ്ടപ്പെട്ട ദക്ഷിണാഫ്രിക്കയെ ബാറ്റിങ്ങിനയച്ച സിംബാബ്വെ, തുടക്കത്തിൽ രണ്ട് ഓപ്പണർമാരെയും വെറും 24 റൺസിന് പുറത്താക്കി ശരിയായ തീരുമാനം എടുത്തതായി തോന്നി. എന്നിരുന്നാലും, സിംബാബ്വെ ബോളർമാരെ തകർത്തുകൊണ്ട് മുൾഡർ ഒരു പ്രത്യാക്രമണത്തിലൂടെ ടീമിനെ ഉറപ്പിച്ചു. 334 പന്ത് നേരിട്ട താരം 49 ഫോറുകളുടെയു നാല് സിക്സിന്റെയും അകമ്പടിയിൽ 367* റൺസെടുത്ത് പുറത്താകാതെനിന്നു.