ഏഷ്യാ കപ്പും ലോകകപ്പും മുന്നില്‍ നില്‍ക്കെ ഇന്ത്യന്‍ ടീമില്‍ ഇടം നേടുന്നതിനായി വിന്‍ഡീസ് പരമ്പര മുതലാക്കേണ്ടത് സഞ്ജു സാംസണിനെ സംബന്ധിച്ച് അത്യാവശ്യമായിരുന്നു. എന്നാല്‍ അത് മുതലാക്കാന്‍ സാധിക്കാതെ പോയി. അതിനാല്‍ തന്നെ സഞ്ജുവിനെതിരെ ശക്തമായ വിമര്‍ശനങ്ങളാണ് ഉയരുന്നത്. ഇപ്പോഴിതാ ഇക്കാര്യത്തില്‍ തന്റെ അഭിപ്രായം തുറന്നുപറഞ്ഞിരിക്കുകയാണ് ക്രിക്കറ്റ് ഇതിഹാസം കപില്‍ ദേവ്.
സഞ്ജു സാംസണെ കുറിച്ച് മാത്രം പറയുന്നത് ശരിയല്ല. നമ്മള്‍ സംസാരിക്കുന്നത് ഇന്ത്യന്‍ ടീമിനെ കുറിച്ചാണ്. അവന്‍ ഒരു മികച്ച കളിക്കാരനും മികച്ച പ്രതിഭയുള്ള താരവുമാണെന്ന് ഞാന്‍ കരുതുന്നു. പക്ഷേ, അദ്ദേഹം കൂടുതല്‍ സ്വയം മെച്ചപ്പെടേണ്ടതുണ്ട്- കപില്‍ ദേവ് ടൈംസ് ഓഫ് ഇന്ത്യയോട് പറഞ്ഞു.
വിന്‍ഡീസിനെതിരായ പരമ്പരയില്‍ ഇന്ത്യന്‍ നിരയില്‍ ഏറ്റവും നിരാശപ്പെടുത്തിയ താരങ്ങളിലൊരാള്‍ സഞ്ജുവാണ്. 12, 7, 13 എന്നിങ്ങനെയാണ് സഞ്ജുവിന്റെ സ്‌കോര്‍. രണ്ട് മത്സരത്തില്‍ ബാറ്റ് ചെയ്യാന്‍ അവസരം ലഭിച്ചതുമില്ല.
വെസ്റ്റ് ഇന്‍ഡീസില്‍ സഞ്ജു സാംസണിനെ എങ്ങനെ തളക്കണമെന്നതില്‍ വ്യക്തമായ പ്ലാനുണ്ടായിരുന്നെന്ന് റൊമാരിയോ ഷെപ്പേര്‍ഡ് വെളിപ്പെടുത്തി. സഞ്ജുവിനെതിരേ വെസ്റ്റ് ഇന്‍ഡീസിന് നേരത്തെ പദ്ധതികളുണ്ടായിരുന്നെന്നും അതുപയോഗിച്ചാണ് സഞ്ജുവിനെ പൂട്ടിയതെന്നും ഷെപ്പേര്‍ഡ് പറഞ്ഞു.
