ഐപിഎല്ലിൽ ഇന്നലെ നടന്ന പോരിൽ ഗുജറാത്ത് ടൈറ്റൻസിനെതിരെ ലക്നൗ സൂപ്പർ ജയന്റ്സ് ആശ്വാസ ജയം സ്വന്തമാക്കി. പ്ലേ ഓഫ് എത്താതെ പുറത്തായ ലക്നൗ മിച്ചൽ മാർഷിന്റെ സെഞ്ച്വറി മികവിൽ 236 റൺസ് എന്ന കൂറ്റൻ വിജയലക്ഷ്യം ഗുജറാത്തിന് മുന്നിൽ വെച്ചപ്പോൾ അവർക്ക് 9 വിക്കറ്റ് നഷ്ടത്തിൽ 202 റൺസ് നേടാനെ സാധിച്ചുള്ളൂ. ലക്നൗവിന് 33 റൺസ് വിജയം. 57 റൺസ് നേടിയ ഷാറൂഖ് ഖാനാണ് ഗുജറാത്തിന്റെ ടോപ് സ്കോറർ.
ആദ്യം ബാറ്റ് ചെയ്ത ലക്നൗ തുടക്കം മുതൽ ആക്രമണ മൂഡിൽ ആയിരുന്നു. ഓപ്പണർ മിച്ചൽ മാർഷ് തന്നെ ആയിരുന്നു കൂട്ടത്തിൽ അപകടകാരി. 64 പന്തിൽ 117 റൺ നേടിയ മാർഷ് ഗുജറാത്ത് ബോളർമാർക്ക് വയറുനിറയെ കൊടുത്തു. 10 ബൗണ്ടറിയും 8 സിക്സും ആണ് ഇന്നിങ്സിൽ താരത്തിന്റെ ബാറ്റിൽ നിന്ന് പിറന്നത്. മാർഷിനെ കൂടാതെ 27 പന്തിൽ 56 റൺ എടുത്ത നിക്കോളാസ് പൂരനും മോശമാക്കിയില്ല.
എന്തിരുന്നാലും വമ്പനടികൾ കൊണ്ട് ഓർത്തിരിക്കുന്ന മത്സരത്തിൽ ശ്രദ്ധ നേടിയത് മറ്റൊരു കാര്യമാണ്. നിക്കോളാസ് പൂരന്റെ പ്രഹരം ഏറ്റുവാങ്ങിയ സിറാജ് അദ്ദേഹവുമായി ഏറ്റുമുട്ടിയ വീഡിയോ ഇപ്പോൾ ചർച്ചയാകുകയാണ്. മത്സരത്തിന്റെ 15-ാം ഓവറിൽ പൂരൻ സിറാജിനെ ബൗണ്ടറിയിലേക്ക് പായിച്ചതോടെയാണ് സംഭവത്തിന്റെ തുടക്കം. ഉടൻ തന്നെ സിറാജ് പൂരന്റെ അടുത്തേക്ക് പോയി ഒരു ഡോട്ട് ബോൾ എറിഞ്ഞ ശേഷം അദ്ദേഹത്തെ സ്ലെഡ്ജ് ചെയ്തു. രണ്ട് കളിക്കാരും ചില വാക്കുകൾ പരസ്പരം കൈമാറി. എന്നിരുന്നാലും, ഇതോടെ കലിപ്പിലായ പുരൻ തുടർന്നുള്ള പന്തുകളിൽ ഒരു സിക്സും ഫോറും നേടി സിറാജിനുള്ള മറുപടി ശക്തമായ ഭാഷയിൽ തന്നെ നൽകുക ആയിരുന്നു.
ഇതുവരെ മികച്ചൊരു സീസൺ കളിച്ച സിറാജിന്, ലഖ്‌നൗ സൂപ്പർ ജയന്റ്‌സിനെതിരെ നാല് ഓവറിൽ 37/0 എന്ന സ്പെൽ എറിഞ്ഞ് ഓർക്കാൻ ഒന്നും തന്നെ ഉണ്ടായിരുന്നില്ല. കൂടാതെ, സിറാജിന് കഴിഞ്ഞ രണ്ട് മത്സരങ്ങളിൽ വിക്കറ്റ് നേടാൻ കഴിഞ്ഞിട്ടില്ലെന്നും കഴിഞ്ഞ അഞ്ച് മത്സരങ്ങളിൽ മൂന്ന് വിക്കറ്റുകൾ മാത്രമേ നേടിയിട്ടുള്ളൂവെന്നും ശ്രദ്ധിക്കേണ്ടതാണ്, മികച്ച സീസൺ കളിക്കുകയും പോയിന്റ് പട്ടികയിൽ ഒന്നാം സ്ഥാനത്ത് തുടരുകയും ചെയ്യുന്ന ഗുജറാത്ത് ടൈറ്റൻസിന് ഇത് ആശങ്കാജനകമാണ്.
https://twitter.com/i/status/1925580499776376945