ഇംഗ്ലണ്ടിനെതിരായ ടെസ്റ്റ് പരമ്പരയ്ക്കുളള ഇന്ത്യന് ടീമിനെ പ്രഖ്യാപിച്ച ശേഷം വലിയ വിവാദങ്ങള്ക്കാണ് അത് തിരികൊളുത്തിയത്. ശ്രേയസ് അയ്യരിനെ പോലുളള മികച്ച താരങ്ങളെ ടീമില് എടുക്കാത്തതില് വലിയ രീതിയിലുളള പ്രതിഷേധങ്ങളാണ് സോഷ്യല് മീഡിയയില് ഉണ്ടായത്. വിരാട് കോഹ്ലി, രോഹിത് ശര്മ്മ എന്നീ താരങ്ങള് വിരമിച്ച ഒഴിവുകളിലേക്ക് സായി സുദര്ശന്, കരുണ് നായര്, അഭിമന്യൂ ഈശ്വരന് തുടങ്ങിയ താരങ്ങളാണ് എത്തിയത്. ഇതില് സായി സുദര്ശനെ ടീമില് എടുക്കുന്നതില് കോച്ച് ഗംതം ഗംഭീറിന് അത്ര താല്പര്യമുണ്ടായിരുന്നില്ല എന്നാണ് പുറത്തുവരുന്ന റിപ്പോര്ട്ടുകള് സൂചിപ്പിക്കുന്നത്.
പുതിയ ക്യാപ്റ്റന് ശുഭ്മാന് ഗില് ആവശ്യപ്പെട്ടതനുസരിച്ചാണ് സായിയെ ടീമിലെടുത്തതെന്നാണ് വിവരം. “ഗംഭീറിന്റെ കളിക്കാരുടെ തെരഞ്ഞെടുപ്പ് കണ്ട് സെലക്ടര്മാര് പോലും ഞെട്ടിപ്പോയി. ഇതില് ബോര്ഡ് ഒഫീഷ്യല്സില് ആരും അഭിപ്രായം പറയാന് തയ്യാറായില്ല. ഗംഭീറും ഒരു ഇടംകയ്യന് ഓപ്പണറായിരുന്നു, അദ്ദേഹം സായിയെ ടീമിലെടുക്കുന്നത് എതിര്ക്കുന്നതില് അര്ത്ഥമില്ല”, ബിസിസിഐ വൃത്തങ്ങള് പറഞ്ഞു.
ടീമിലെടുത്തെങ്കിലും സായി സുദര്ശനെ ഇലവനില് കളിപ്പിക്കുന്ന കാര്യത്തിലുളള അവസാന തീരുമാനം ഗംഭീറില് നിന്നായിരിക്കും വരിക. എന്നാലും ഇംഗ്ലണ്ടില് മുന്പ് കളിച്ച് പരിചയമുളള താരമാണ് സായി. കൗണ്ടി ചാമ്പ്യന്ഷിപ്പ് 2023-24 സീസണില് താരം കളിച്ചിട്ടുണ്ട്. ആ സമയത്ത് ഇവിടത്തെ സാഹചര്യവുമായി പൊരുത്തപ്പെട്ട് ശ്രദ്ധേയ പ്രകടനം കാഴ്ചവയ്ക്കുകയും ചെയ്തു.