ഈ സീസണില്‍ വിരാട് കോഹ്‌ലി (Virat Kohli) ആര്‍സിബിയുടെ നായകസ്ഥാനം ഒഴിയുന്നതിനാല്‍ യുവതാരം ദേവ്ദത്തിനെ (Devdutt Padikkal) ആ സ്ഥാനത്തേക്ക് നിര്‍ദ്ദേശിച്ച് മുന്‍ താരം ആശിഷ് നെഹ്റ. കോഹ്‌ലിയുടെ സ്ഥാനത്തേക്ക് പരിഗണിക്കാവുന്ന ഏറ്റവും അനുയോജ്യനായ താരം ദേവ്ദത്താണെന്ന് നെഹ്റ പറഞ്ഞു.
‘ആര്‍സിബി (RCB) ടീമിനെ നയിക്കാനുള്ള കഴിവ് ദേവ്ദത്ത് പടിക്കലിനുണ്ട്. ടീം ആവശ്യപ്പെടുന്നത് ദീര്‍ഘനാളത്തേക്ക് നയിക്കാന്‍ കഴിയുന്ന താരത്തെയാണെങ്കില്‍ ദേവ്ദത്തിന് അതിനുള്ള മികവുണ്ട്. അതിന് അനുയോജ്യനായ താരം ദേവ്ദത്താണ്’ നെഹ്റ പറഞ്ഞു.
ദേവ്ദത്തിന്റെ ക്യാപ്റ്റന്‍സി ആരും കാണാത്തതിനാല്‍ തന്നെ ദേവ്ദത്തിനെ നായകനാക്കണമെന്ന് അടുത്തിടെ ആകാശ് ചോപ്രയും അഭിപ്രായപ്പെട്ടിരുന്നു. ദീര്‍ഘനാളത്തേക്ക് ടീമില്‍ നിലനിര്‍ത്താന്‍ സാധിക്കുന്ന താരമായതിനാല്‍ ദേവ്ദത്തിനെ പരിഗണിക്കണമെന്നാണ് ചോപ്ര പറഞ്ഞത്.
28 ഐപിഎല്‍ (IPL) മത്സരങ്ങളില്‍ നിന്നായി 31.96 ശരാശരിയില്‍ 863 റണ്‍സാണ് ദേവ്ദത്തിന്റെ പേരിലുള്ളത്. 125.25 എന്ന ഭേദപ്പെട്ട സ്ട്രൈക്ക് റേറ്റും താരത്തിനുണ്ട്. ഈ സീസണിലെ ആദ്യ പാദത്തില്‍ 52 പന്തില്‍ 101 റണ്‍സുമായി തന്റെ കന്നി ഐപിഎല്‍ സെഞ്ച്വറിയും ദേവ്ദത്ത് നേടിയിരുന്നു.