ചെന്നൈ ആരാധകർക്ക് ആവേശമായി , മുൻ ഇന്ത്യൻ ബാറ്റ്സ്മാൻ സുരേഷ് റെയ്ന ഐപിഎൽ 2026 ൽ സിഎസ്കെയുടെ ബാറ്റിംഗ് പരിശീലകനാകും. നരേന്ദ്ര മോദി സ്റ്റേഡിയത്തിൽ സിഎസ്‌കെയും ജിടിയും തമ്മിൽ നടന്ന ഐപിഎൽ 2025 മത്സരത്തിനിടെ, കമന്ററി ടീമിന്റെ ഭാഗമായിരുന്ന റെയ്ന, ടീമിന്റെ ബാറ്റിംഗ് പരിശീലകനായി സേവനമനുഷ്ഠിച്ചുകൊണ്ട് യുവ കളിക്കാരെ പരിശീലിപ്പിക്കുന്നതിനായി അടുത്ത വർഷം എംഎസ് ധോണിക്കൊപ്പം ചേരുമെന്ന് സ്ഥിരീകരിച്ചു.
അഞ്ച് തവണ ഐപിഎൽ കിരീടം നേടിയ ചെന്നൈയുടെ ബാറ്റിംഗ് പരിശീലകനായി റെയ്‌നയും ചേരുമെന്ന് ആകാശ് ചോപ്ര കമന്ററി വേളയിൽ സ്ഥിരീകരിച്ചിരുന്നു എന്നത് ശ്രദ്ധിക്കേണ്ടതാണ്. മിസ്റ്റർ ഐപിഎൽ എന്നറിയപ്പെടുന്ന റെയ്ന, 2008 മുതൽ 2021 വരെ ചെന്നൈയുടെ ഭാഗം ആയിരുന്നു. കൂടാതെ, ഇതുവരെയുള്ള സീസൺ നോക്കിയാൽ 5529 റൺസുമായി താരം ഇപ്പോഴും ടീമിന്റെ മുൻനിര റൺ വേട്ടക്കാരനാണ്.
സുരേഷ് റെയ്‌നയെ സിഎസ്കെയുടെ ബാറ്റിംഗ് പരിശീലകനായി നിയമിച്ചതിനെക്കുറിച്ച് ക്ലബ്ബിൽ നിന്ന് ഔദ്യോഗിക പ്രസ്താവനകളൊന്നും വന്നിട്ടില്ല. പക്ഷേ റെയ്ന തന്നെ ഈ വാർത്ത സ്ഥിതീകരിച്ചതിനാൽ ആരാധകർക്ക് ആവേശമായി.
അതേസമയം, ഇന്നലെ സീസണിലെ തങ്ങളുടെ അവസാന പോരിൽ ആദ്യം ബാറ്റ് ചെയ്ത് തലയും സംഘവും ഉയർത്തിയ 231 റൺസ് വിജയലക്ഷ്യം പിന്തുടർന്ന ഗുജറാത്തിന് 147 റൺസ് നേടാനെ സാധിച്ചുള്ളൂ. സീസണിലെ അവസാന മത്സരത്തിൽ ചെന്നൈയ്ക്ക് 83 റൺസിന്റെ ആശ്വാസ ജയം സ്വന്തമാക്കി.
മത്സരശേഷം താൻ അടുത്ത സീസണിൽ കളിക്കുമോ എന്ന് ഇപ്പോൾ പറയാൻ പറ്റില്ല എന്നും ആ കാര്യത്തിൽ അടുത്ത സീസണ് മുമ്പ് മാത്രമേ തീരുമാനം എടുക്കു എന്നാണ് ധോണി പറഞ്ഞത്.