ടെസ്റ്റ് പരമ്പരയിൽ ഇന്ത്യയുടെ സ്റ്റാർ പേസർ ജസ്പ്രീത് ബുംറയെ ഇംഗ്ലണ്ട് ടീമിന് പേടിയില്ലെന്ന് പറഞ്ഞ് ക്യാപ്റ്റൻ ബെൻ സ്റ്റോക്സ്. ബുംറയെ കൊണ്ട് മാത്രം ഇന്ത്യയ്ക്ക് ടെസ്റ്റ് പരമ്പര നേടികൊടുക്കാൻ കഴിയില്ലെന്നും സ്റ്റോക്സ് പറഞ്ഞു. ജൂൺ 20നാണ് ഇന്ത്യ- ഇംഗ്ലണ്ട് സീരീസിലെ ആദ്യ ടെസ്റ്റ് ലീഡ്സിൽ ആരംഭിക്കുക. ഇംഗ്ലണ്ട് ടീമിനെ കഴിഞ്ഞ ദിവസം സോഷ്യൽ മീഡിയയിലൂടെ പ്രഖ്യാപിച്ചിരുന്നു. എന്നാൽ ഇന്ത്യ തങ്ങളുടെ ഇലവനിൽ ആരെല്ലാമാണെന്ന് പുറത്തുവിട്ടിട്ടില്ല.
അഞ്ച് മത്സരങ്ങൾ ഉൾപ്പെടുന്ന ടെസ്റ്റ് പരമ്പരയ്ക്കാണ് ഇംഗ്ലണ്ട് ആതിഥേയത്വം വഹിക്കുന്നത്. ബുംറ തന്നെയായിരിക്കും ഇംഗ്ലണ്ടിനെതിരെ ഇന്ത്യയുടെ പേസ് ബോളിങിന് നേതൃത്വം നൽകുക. ഇംഗ്ലണ്ടിൽ ഇതുവരെ ഒമ്പത് ടെസ്റ്റുകൾ കളിച്ചിട്ടുളള ബുംറ ഇത്രയും മത്സരങ്ങളിൽ നിന്നായി 37 വിക്കറ്റുകളാണ് വീഴ്ത്തിയിട്ടുളളത്. 26.27 ആണ് ശരാശരി. എക്കണോമി റേറ്റ് 2.72ഉം. സ്ട്രൈക്ക് റേറ്റ് 57.8ഉം.
ജസ്പ്രീത് ബുംറയുടെ ബോളിങ് നിലവാരം എന്താണെന്ന് കൃത്യമായി അറിയാമെന്ന് ബെൻ സ്റ്റോക്സ് പറയുന്നു. എന്നാൽ മികച്ച പേസർമാരെ ഞങ്ങൾ ഭയപ്പെടുന്നില്ല. ബുംറയ്ക്ക് ഇന്ത്യയ്ക്കായി അഞ്ച് മത്സരങ്ങളുളള ടെസ്റ്റ് പരമ്പര ഒറ്റക്ക് ജയിക്കാൻ കഴിയില്ലെന്ന് സ്റ്റോക്സ് അഭിപ്രായപ്പെട്ടു.
“അന്താരാഷ്ട്ര ക്രിക്കറ്റിൽ, നിങ്ങൾക്ക് എല്ലായ്പ്പോഴും മികച്ച എതിരാളികളെ നേരിടേണ്ടിവരും. ബുംറയുടെ നിലവാരവും, കളിക്കുന്ന ഏത് ടീമിനായും അദ്ദേഹം എന്താണ് ചെയ്യാറുളളതെന്നും നമുക്കറിയാം. പക്ഷേ ഞങ്ങൾ ബുംറയെ പേടിക്കുന്നില്ല. ഒരു ബോളറെ കൊണ്ട് മാത്രം സ്വന്തം ടീമിനെ പരമ്പരവിജയത്തിലേക്ക് എത്തിക്കാൻ കഴിയുമെന്ന് ഞാൻ കരുതുന്നില്ല. അതിന് 11 കളിക്കാരും നന്നായി ശ്രമിക്കണം”, ഇംഗ്ലണ്ട് ക്യാപ്റ്റൻ കൂട്ടിച്ചേർത്തു.