മുംബൈ: ദക്ഷിണാഫ്രിക്കയ്ക്കെതിരെയുളള ടെസ്റ്റ് ടീമിനെ പ്രഖ്യാപിച്ചു. 15 അംഗ ടീമിനെയാണ് പ്രഖ്യാപിച്ചത്. യുവതാരം ശുഭ്മാന് ഗില് ടീമില് ഇടംപിടിച്ചതാണ് ഏറ്റവും ശ്രദ്ധേയമായ കാര്യം. മൂന്ന് ടെസ്റ്റ് മത്സരങ്ങളാണ് ഇന്ത്യ ദക്ഷിണാഫ്രിക്കയ്ക്കെതിരെ കളിക്കുക.
ഓപ്പണര് കെ എല് രാഹുലിനെ ടീമില് നിന്ന് ഒഴിവാക്കിയിട്ടുണ്ട്. പകരംഏകദിന വൈസ് ക്യാപ്റ്റനായ രോഹിത് ശര്മ ഇനി ടെസ്റ്റിലും ഓപ്പണറാവും. മോശം ഫോമിലുള്ള വിക്കറ്റ് കീപ്പര് റിഷഭ് പന്തിനെ ടീമില് നിലനിര്ത്തിയിട്ടുണ്ട്.
മായങ്ക് അഗര്വാളിനൊപ്പമാണ് രോഹിത് ഓപ്പണ് ചെയ്യുക. റിസര്വ് ഓപ്പണറായിരിക്കും ഗില്. ആദ്യമായിട്ടാണ് ഗില് ടെസ്റ്റ് ടീമിലെത്തുന്നത്. ഇന്ത്യ എയ്ക്ക് വേണ്ടി നടത്തിയ മികച്ച പ്രകടനമാണ് താരത്തിന് തുണയായത്. നേരത്തെ നിശ്ചിത ഓവര് ക്രിക്കറ്റില് ഇന്ത്യന് ജെഴ്സി അണിഞ്ഞിരുന്നു. അതേസമയം, ഹാര്ദിക് പാണ്ഡ്യയെ ടീമിലേക്ക് പരിഗണിച്ചിട്ടില്ല.
മൂന്ന് വീതം പേസര്മാരും സ്പിന്നര്മാരും അടങ്ങുന്നതാണ് ഇന്ത്യന് ടീം. ആര് അശ്വിന്, രവീന്ദ്ര ജഡേജ, കുല്ദീപ് യാദവ് എന്നിവരാണ് സ്പിന്നര്മാര്. മുഹമ്മദ് ഷമി, ജസ്പ്രീത് ഭുംറ, ഇശാന്ത് ശര്മ എന്നിവര് സ്ഥാനം നിലനിര്ത്തി.
ടീം ഇന്ത്യ: വിരാട് കോഹ്ലി (ക്യാപ്റ്റന്), മായങ്ക് അഗര്വാള്, രോഹിത് ശര്മ, ചേതേശ്വര് പൂജാര, അജിന്ക്യ രഹാനെ (വൈസ് ക്യാപ്റ്റന്), ഹനുമ വിഹാരി, ഋഷഭ് പന്ത് (വിക്കറ്റ് കീപ്പര്), ശുഭ്മാന് ഗില്, വൃദ്ധിമാന് സാഹ, ആര് അശ്വിന്, രവീന്ദ്ര ജഡേജ, കുല്ദീപ് യാദവ്, മുഹമ്മദ് ഷമി, ജസ്പ്രീത് ഭുംറ, ഇശാന്ത് ശര്മ.