ഏഷ്യ കപ്പ് സൂപ്പർ ഫോർ പോരാട്ടത്തിൽ ഇന്ത്യയ്ക്കെതിരെ ടോസ്സ് നേടിയ പാകിസ്ഥാൻ ക്യാപ്റ്റൻ ബാബർ അസം ബൗളിങ്ങ് തിരഞ്ഞെടുത്തു.ചിരവൈരികളായ രണ്ട് തുല്യ ശക്തികളുടെ പോരാട്ടം വളരെ പ്രതീക്ഷയോടെയാണ് കായിക പ്രേമികൾ കാത്തിരിക്കുന്നത്.
പാകിസ്ഥാന്റെ പേസ് ബൗളർമാരും ഇന്ത്യയുടെ ടോപ്പ് ഓർഡർ ബാറ്റിങ് നിരയും തമ്മിലായിരിക്കും കനത്ത മത്സരം നടക്കാൻ പോകുന്നത്. മഴയുടെ മുന്നറിയിപ്പ് നിലനിൽക്കുന്നതിനാൽ ഇത്തവണയും മുഴുവൻ മത്സരവും ഉണ്ടാവുമോ എന്നതാണ് കാണികൾ ഉറ്റുനോക്കുന്ന കാര്യം.
സൂപ്പർ ഫോറിലെ ആദ്യ മത്സരത്തിനാണ് ഇന്ന് ഇന്ത്യ ഇറങ്ങുന്നത്, അതേ സമയം ബംഗ്ലാദേശിനെ തോൽപ്പിച്ചതിന്റെ ആത്മവിശ്വാസത്തിലാണ് പാകിസ്ഥാൻ. അതുകൊണ്ട് തന്നെ ഇന്നത്തെ മത്സരത്തിൽ ജയം നേടേണ്ടത് ഇന്ത്യയ്ക്ക് അനിവാര്യമായിരിക്കുകയാണ്.
മത്സരം ഏഴോവർ പിന്നിടുമ്പോൾ വിക്കറ്റുകൾ നഷ്ടമാവാതെ ഇന്ത്യ 46 റൺസ് എടുത്തിട്ടുണ്ട്. പതിവുപോലെ രോഹിത് ശർമ്മയും ശുഭ്മാൻ ഗില്ലുമാണ് ക്രീസിൽ.