മുന്‍ ഇന്ത്യന്‍ താരം സഹീര്‍ഖാന് ജന്മദിനാശംസകള്‍ നേര്‍ന്ന് പുലിവാല്‍ പിടിച്ചിരിക്കുകയാണ് ഇന്ത്യന്‍ താരം ഹാര്‍ദ്ദിക്ക്പാണ്ഡ്യ. സഹീറിനെ പരിഹസിക്കുന്ന തരത്തില്‍ ജന്മദിനാശംസ നേര്‍ന്നതാണ് ഹാര്‍ദ്ദിക്കിന് വിനയായിരിരിക്കുന്നത്.
ഒരു മത്സരത്തില്‍ സഹീര്‍ ഖാനെ സിക്സറിന് പറത്തുന്ന വീഡിയോയ്ക്കൊപ്പമാണ് ഹാര്‍ദ്ദിക് ജന്മദിനാശംസ നേര്‍ന്നത്. “സന്തോഷ ജന്മദിനം സാക് (സഹീര്‍). അന്ന് ഞാന്‍ ചെയ്തത് പോലെ ഇത്തവണത്തെ പിറന്നാള്‍ പാര്‍ക്കിന് വെളിയില്‍ അടിച്ചാഘോഷിക്കുമെന്ന് കരുതുന്നു”, ഹാര്‍ദ്ദിക് കുറിച്ചു
ഈ ആശംസാവചനങ്ങളും വീഡിയോയുമാണ് ഹാര്‍ദ്ദിക്കിനെതിരെ ആരാധകര്‍ തിരിയാന്‍ കാരണമായത്. ഹാര്‍ദ്ദിക്കിന്റേത് സഹീറിനെ പരിഹസിക്കുന്ന ആശംസയായി പോയെന്നാണ് ആരാധകരുടെ വിലയിരുത്തല്‍.
പണവും പ്രശസ്തിയുമുണ്ടായാല്‍ മാത്രം ക്ലാസുണ്ടാവില്ല. നല്ല കാലത്തായിരുന്നെങ്കില്‍ സഹീറിന്റെ പന്തുകള്‍ക്ക് മുന്നില്‍ ഹാര്‍ദ്ദിക്കിന് പിടിച്ചു നില്‍ക്കാനാവില്ല. ആത്മവിശ്വാസം കൂടിപ്പോയതാണ് ഇവിടെ ഹാര്‍ദ്ദിക്കിന്റെ പ്രശ്നമെന്ന് ആരാധകര്‍ പറയുന്നു. 2003, 2007, 2011 ലോക കപ്പുകളില്‍ ഇന്ത്യയ്ക്കായി ഏറ്റവും കൂടുതല്‍ വിക്കറ്റുകള്‍ നേടിയ ബൗളറാണ് സഹീര്‍ ഖാനെന്ന ഓര്‍മ്മപ്പെടുത്തലുകള്‍ ഹാര്‍ദ്ദിക്കിന്റെ പോസ്റ്റിന് ചുവടെ ധാരാളം കാണാം.