ഇന്ത്യയിലെ തൊഴിലില്ലായ്മക്ക് കാരണം രാജ്യത്തെ കുറച്ച് സമ്പന്നരാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. രണ്ടോ മൂന്നോ സമ്പന്നരുടെ കൈയ്യില്‍ പണം കുമിഞ്ഞ് കൂടുന്നതാണ് ഇന്ത്യയിലെ തൊഴിലില്ലായ്മ ഉണ്ടാക്കുന്നതെന്ന് രാഹുല്‍ ഗാന്ധി പറഞ്ഞു.
ഇന്ന് നമ്മുടെ മുന്നില്‍ രണ്ട് ഇന്ത്യയാണ് ഉള്ളത്. ആദ്യത്തെ ഇന്ത്യയില്‍ കര്‍ഷകര്‍, തൊഴിലാളികള്‍, ചെറുകിട വ്യാപാരികള്‍, തൊഴിലില്ലാത്തവര്‍, എന്നിവരാണ് ഉള്ളത്. ഇതാണ് കോടിക്കണക്കിന് പേരുടെ ഇന്ത്യ. മറ്റേ ഇന്ത്യ രാജ്യത്ത് മുന്നൂറോളം വരുന്ന ധനികര്‍ക്കുള്ളതാണെന്നും രാഹുല്‍ പറഞ്ഞു.
പ്രധാനമന്ത്രി സ്ഥാനാര്‍ത്ഥി ആരെന്ന മാധ്യമങ്ങളുടെ ചോദ്യം ഭാരത് ജോഡോ യാത്ര വഴിതെറ്റിക്കാനാണെന്ന് രാഹുല്‍ പറഞ്ഞു. മാധ്യമങ്ങള്‍ കാണുന്ന രാഹുല്‍ അല്ല താന്‍. ബിജെപി കാണുന്ന രാഹുലും അല്ല. താന്‍ എന്താണ് ഉദ്ദേശിച്ചത് എന്ന് മനസ്സിലാക്കണമെങ്കില്‍ ഹിന്ദു ധര്‍മ്മം പഠിക്കണമെന്ന് രാഹുല്‍ ഗാന്ധി പറഞ്ഞു.
അതിനിടെ, കൊടുംതണുപ്പില്‍ കൊച്ചുകുട്ടിയെ ഷര്‍ട്ടില്ലാതെ ഭാരത് ജോഡോ യാത്രയില്‍ നടത്തിച്ചതിന് എതിരെ വ്യാപക വിമര്‍ശനം ഉയരുകയാണ്. സ്വാതന്ത്ര്യ സമരസേനാനി ചന്ദ്രശേഖര്‍ ആസാദിന്റെ മാതൃകയിലുള്ള വേഷം അണിയിച്ചാണ് കുട്ടിയെ ഷര്‍ട്ടിടാതെ മുണ്ട് മാത്രം ധരിപ്പിച്ച് കോണ്‍ഗ്രസ് പ്രവര്‍ത്തകര്‍ രാഹുലിനൊപ്പം നടത്തിച്ചത്.
ബിജെപി ദേശീയ നേതാക്കള്‍ അടക്കം ഇതിനെതിരെ രംഗത്ത് വന്നിട്ടുണ്ട്. ഉത്തരേന്ത്യയിലെ കൊടുംതണുപ്പില്‍ കൊച്ചു കുട്ടിയെ ഷര്‍ട്ടും ജാക്കറ്റും ധരിപ്പിക്കാതെ നടത്തിക്കാന്‍ നാണമില്ലാത്തവര്‍ക്ക് മാത്രമേ സാധിക്കൂവെന്ന് ബിജെപി നേതാവ് തജീന്ദര്‍ പാല്‍ ട്വീറ്റ് ചെയ്തു.