ദേശീയ വിദ്യാഭ്യാസ നയം വിഭാവനം ചെയ്യുന്നതുപോലെ വിദ്യാർത്ഥികളെ ബഹുഭാഷാ പൗരന്മാരായി രൂപപ്പെടുത്തുന്നതിന്റെ ലക്ഷ്യത്തെ ഹരിയാന സർക്കാരിന്റെ തീരുമാനം പരാജയപ്പെടുത്തുമെന്ന് ഭാഷാശാസ്ത്രജ്ഞരും ആക്ടിവിസ്റ്റുകളും അഭിപ്രായപ്പെടുന്നു. ഈ നീക്കത്തിൽ കേന്ദ്രത്തിന്റെ മൗനത്തെയും ഇവർ ചോദ്യം ചെയ്യുന്നു.
ഫെബ്രുവരി 20 ന് ഹരിയാന സർക്കാർ ത്രിഭാഷാ ഫോർമുല നടപ്പിലാക്കുന്നത് സംബന്ധിച്ച് ഉത്തരവ് പുറപ്പെടുവിച്ചു. ഒമ്പത്, പത്ത് ക്ലാസുകളിലെ വിദ്യാർത്ഥികൾ ഇംഗ്ലീഷും ഹിന്ദിയും നിർബന്ധിത ഭാഷകളായി പഠിക്കുകയും സംസ്കൃതം, പഞ്ചാബി അല്ലെങ്കിൽ ഉറുദു എന്നിവയിൽ നിന്ന് ഒരു മൂന്നാം ഭാഷ തിരഞ്ഞെടുക്കുകയും വേണം. ഭിവാനിയിലെ സ്കൂൾ വിദ്യാഭ്യാസ ബോർഡുമായി അഫിലിയേറ്റ് ചെയ്തിട്ടുള്ള സർക്കാർ, സ്വകാര്യ സ്കൂളുകൾക്കാണ് ഈ ഉത്തരവ് ബാധകമാവുക.
1968 ലെ ദേശീയ വിദ്യാഭ്യാസ നയം ശുപാർശ ചെയ്തതുപോലെ ഹരിയാന ഉൾപ്പെടെയുള്ള ഉത്തരേന്ത്യൻ സംസ്ഥാനങ്ങൾ ഒരിക്കലും ത്രിഭാഷാ നയം നടപ്പാക്കിയിട്ടില്ലെന്നും ചില മാറ്റങ്ങളോടെ ഇത് തുടരുകയാണെന്നും പേര് വെളിപ്പെടുത്താൻ ആഗ്രഹിക്കാത്ത ഒരു ഭാഷാശാസ്ത്രജ്ഞൻ പറഞ്ഞു. 1968 ലെ NEP പ്രകാരമുള്ള ത്രിഭാഷാ ഫോർമുല, ഹിന്ദി സംസാരിക്കുന്ന സംസ്ഥാനങ്ങളിൽ ഹിന്ദിയും ഇംഗ്ലീഷും കൂടാതെ ഒരു ആധുനിക ഇന്ത്യൻ ഭാഷ പഠിക്കാൻ ശുപാർശ ചെയ്യുന്നു. ഹിന്ദി സംസാരിക്കാത്ത സംസ്ഥാനങ്ങളിൽ പ്രാദേശിക ഭാഷയ്ക്കും ഇംഗ്ലീഷിനും ഒപ്പം ഹിന്ദിയും പഠിക്കാൻ ശുപാർശ ചെയ്തു.