സ്പെഷ്യൽ മാരേജ് ആക്ട് പ്രകാരം ഓൺലൈൻ വഴി വിവാഹം നടത്തണമെന്ന ആവശ്യം നിഷേധിക്കാനാവില്ലെന്ന് ഹൈക്കോടതി. ഈ വിഷയത്തിൽ ഹൈക്കോടതി 2021 സെപ്റ്റംബർ ഒൻപതിന് പുറപ്പെടുവിച്ച ഉത്തരവ് അന്തിമമാക്കിയാണ് ജസ്റ്റിസ് എ മുഹമ്മദ് മുഷ്താഖ്, ജസ്റ്റിസ് സോഫി തോമസ് എന്നിവരുൾപ്പെട്ട ഡിവിഷൻ ബെഞ്ചിന്റെ ഉത്തരവ്.
സ്പെഷ്യൽ മാരേജ് ആക്ട് പ്രകാരം വിവാഹം രജിസ്റ്റർ ചെയ്യുമ്പോൾ ഇടക്കാല ഉത്തരവിൽ നൽകിയ മാർഗ നിർദശങ്ങൾ പാലിക്കണമെന്നും കോടതി നിർദേശിച്ചു. 2000 ൽ നിലവിൽ വന്ന ഇൻഫർമേഷൻ ടെക്നോളജി നിയമം കണക്കിലെടുത്തുകൊണ്ടായിരിക്കണം സ്പെഷ്യൽ മാരേജ് ആക്ടിനെ സമീപിക്കേണ്ടതെന്നും ബെഞ്ച് അഭിപ്രായപ്പെട്ടു. ഐടി നിയമത്തിലെ ആറ് ഇലക്ട്രോണിക് രേഖകൾ ഉപയോഗിക്കുന്നത് അംഗീകരിക്കുന്നുണ്ടെന്നും കോടതി ചൂണ്ടിക്കാട്ടി.
വിവാഹം രജിസ്റ്റർ ചെയ്യാൻ സ്പെഷ്യൽ മാരേജ് ആക്ട് പ്രകാരം വധൂവരൻമാർ വിവാഹ രജിസ്ട്രേഷൻ ഓഫീസിൽ ഹാജരാകണമെന്നതാണ് വ്യവസ്ഥ. കോവിഡ് നിയന്ത്രണങ്ങൾ വന്ന കാലഘട്ടത്തിൽ നിയമത്തിൽ ഇളവ് തേടി നിരവധി പേർ കോടതിയെ സമീപിച്ചിരുന്നു.
ഓൺലൈൻ വിവാഹത്തിന് കോടതി നൽകിയ നിർദേശങ്ങൾ
- ഓൺലൈൻ വഴിയുള്ള വിവാഹത്തിന്റെ സാക്ഷികൾ മാരേജ് ഓഫീസർക്ക് മുമ്പാകെ നേരിട്ട് ഹാജരാകണം
- ഓൺലൈനിൽ ഹാജരാകുന്ന വധൂവരൻമാരെ സാക്ഷികൾ തിരിച്ചറിയണം.
- വധൂവരൻമാരെ തിരിച്ചയാൻ പാസ്പോർട്ടിന്റെയോ മറ്റ് തിരിച്ചറിയൽ രേഖകളുടേയൊ പകർപ്പ് ഓഫീസർക്ക് നൽകണം
- വധൂവരൻമാരുടെ പവർ ഓഫ് അറ്റോർണിയുള്ളവർ ഇവർക്കുവേണ്ടി ഒപ്പു വെക്കണം
- വിവാഹത്തീയതിയവും സമയവും മാരേജ് ഓഫീസർ തീരുമാനിച്ച് നേരത്തെ അറിയിക്കണം
- ഏത് ഓൺലൈൻ പ്ലാറ്റ് ഫോം വേണമെന്ന് ഓഫീസർക്ക് തീരുമാനിക്കാം
- വിവാഹം കഴിഞ്ഞ് സർട്ടിഫിക്കറ്റ് നിയമപ്രകാരം നൽകണം