ബോളിവുഡിലെ ഇതിഹാസ താരം ദിലീപ് കുമാർ അന്തരിച്ചു. 98 വയസ്സായിരുന്നു. മുംബൈയിലെ ഹിന്ദുജ ആശുപത്രിയിൽ വച്ചായിരുന്നു അന്ത്യം. ശ്വാസതടസ്സം ഉണ്ടായതിനെ തുടർന്ന് കഴിഞ്ഞ ആഴ്ച ദിലീപ് കുമാറിനെ ആശുപത്രിയിൽ പ്രവേശിപ്പിച്ചിരുന്നു- ഈ മാസം ഇത് രണ്ടാം തവണയാണ് അദ്ദേഹത്തെ ആശുപത്രിയിൽ പ്രവേശിപ്പിക്കുന്നത്.
ബുധനാഴ്ച രാവിലെ 7.30 നാണ് ദീർഘനാളായി തുടരുന്ന അസുഖത്തെ തുടർന്ന് അദ്ദേഹം അന്തരിച്ചത് എന്ന് ദിലീപ് കുമാറിനെ ചികിത്സിച്ചു കൊണ്ടിരുന്ന ഡോ. ജലീൽ പാർക്കർ പറഞ്ഞതായി വാർത്താ ഏജൻസി പിടിഐ റിപ്പോർട്ട് ചെയ്തു.
1944 ൽ “ജ്വാർ ഭട്ട” എന്ന ചിത്രത്തിലൂടെയാണ് ദിലീപ് കുമാർ അഭിനയരംഗത്തേക്ക് പ്രവേശിച്ചത്. “മുഗൾ-ഇ-അസം”, “ദേവദാസ്”, “നയാ ദൗർ”, “രാം ഔർ ശ്യാം” തുടങ്ങിയ ഹിറ്റുകളിലൂടെ ദിലീപ് കുമാറിന്റെ അഭിനയ ജീവിതം അഞ്ച് പതിറ്റാണ്ടിലേറെ നീണ്ടു. അദ്ദേഹം അവസാനമായി അഭിനയിച്ചത് 1998 ൽ പുറത്തിറങ്ങിയ “ക്വില” എന്ന ചിത്രത്തിലായിരുന്നു.