വധശ്രമക്കേസില് ശിക്ഷിക്കപ്പെട്ട ലക്ഷദ്വീപിലെ എന്സിപി നേതാവ് മുഹമ്മദ് ഫൈസലിനെ എംപി സ്ഥാനത്തുനിന്നും അയോഗ്യനാക്കി. ലോക്സഭാ സെക്രട്ടേറിയേറ്റാണ് ഫൈസലിനെ അയോഗ്യനാക്കിക്കൊണ്ടുള്ള വിജ്ഞാപനം ഇപ്പോള് പുറത്തിറക്കിയിരിക്കുന്നത്.
ക്രിമിനല് കേസില് രണ്ട് വര്ഷത്തിലധികം തടവിന് കോടതി ശിക്ഷിച്ചാല് ആ അംഗത്തെ ഉടനടി അയോഗ്യനാക്കണമെന്നാണ് ചട്ടം. ഇതിന്റെ അടിസ്ഥാനത്തില് ജനപ്രാതിനിധ്യ നിയമത്തിലെ 8.2 വകുപ്പ് പ്രകാരവും ഇന്ത്യന് ഭരണഘടനയുടെ 102-ാം അനുഛേദപ്രകാരവുമാണ് ഇപ്പോള് ലോക്സഭാ സെക്രട്ടേറിയേറ്റ് മുഹമ്മദ് ഫൈസലിന്റെ ലോകസഭാ അംഗത്വത്തിന് അയോഗ്യത കല്പ്പിച്ചുകൊണ്ടുള്ള വിജ്ഞാപനം പുറത്തിറക്കിയിരിക്കുന്നത്. ഇതിന്റെ പകര്പ്പ് ലോക്സഭാ സെക്രട്ടേറിയേറ്റ്, തിരഞ്ഞെടുപ്പ് കമ്മീഷനും കൈമാറിയിട്ടുണ്ട്.
2009 ലോക്സഭാ തിരഞ്ഞെടുപ്പ് പ്രചാരണത്തിനിടെ മുന് കേന്ദ്രമന്ത്രിയും കോണ്ഗ്രസ് നേതാവുമായ പി.എം സയീദിന്റെ മരുമകന് പടന്നയില് മുഹമ്മദ് സാലിഹിനെ ആക്രമിച്ചെന്നാണ് ഫൈസലിനെതിരെയുള്ള കേസ്. കവരത്തി ജില്ലാ സെഷന്സ് കോടതി 10 വര്ഷം കഠിന തടവിന് വിധിച്ച മുഹമ്മദ് ഫൈസല് കണ്ണൂര് ജയിലിലാണ്.
കേസില് ആകെ 32 പ്രതികളുണ്ട്. ഇതില് രണ്ടാംപ്രതിയാണ് മുഹമ്മദ് ഫൈസല്. 2009-ലെ ലോക്സഭ തിരഞ്ഞെടുപ്പ് കാലത്തായിരുന്നു കേസിനാസ്പദമായ സംഭവം. ഒരു ഷെഡ് സ്ഥാപിച്ചതുമായി ബന്ധപ്പെട്ട തര്ക്കമാണ് ആക്രമണത്തില് കലാശിച്ചത്.