പ്രതിപക്ഷ സഖ്യമായ ഇന്ത്യ മുന്നണി ഏഴ് കുടുംബങ്ങളുടെ സഖ്യമെന്ന് കേന്ദ്ര മന്ത്രി അമിത് ഷാ. കോണ്‍ഗ്രസിന്റെ നേതൃത്വത്തിലുള്ളത് കുടുംബ പാര്‍ട്ടികളുടെ സഖ്യമാണെന്ന് അമിത് ഷാ പറഞ്ഞു. പത്തു വര്‍ഷത്തിനുള്ളില്‍ കുടുംബ രാഷ്ട്രീയവും അഴിമതിയും ജാതി വാദവും നരേന്ദ്ര മോദി ഇല്ലാതാക്കിയെന്നും കേന്ദ്ര ആഭ്യന്തര മന്ത്രി കൂട്ടിച്ചേര്‍ത്തു.
ബിജെപി ദേശീയ കൗണ്‍സിലില്‍ സംസാരിക്കുകയായിരുന്നു അമിത് ഷാ. മോദി അധികാരം നിലനിറുത്തുമെന്ന് ജനങ്ങള്‍ തീരുമാനിച്ചിട്ടുണ്ട്. ബിജെപി കുടുംബ പാര്‍ട്ടി ആയിരുന്നെങ്കില്‍ ചായ കച്ചവടക്കാരന്റെ മകന്‍ രാജ്യത്തിന്റെ പ്രധാനമന്ത്രി ആകുമായിരുന്നില്ല. ബിജെപിയെ സംബന്ധിച്ചിടത്തോളം ഏറ്റവും പ്രധാനം രാജ്യസുരക്ഷയാണെന്നും അമിത് ഷാ വ്യക്തമാക്കി.
മോദി സര്‍ക്കാരിന് കീഴില്‍ പത്ത് വര്‍ഷത്തിനുള്ളില്‍ രാജ്യം എല്ലാ മേഖലയിലും വികസനം കൈവരിച്ചതായും കേന്ദ്ര മന്ത്രി പറഞ്ഞു. പ്രധാനമന്ത്രി നരേന്ദ്ര മോദി, ബിജെപി ദേശീയ അധ്യക്ഷന്‍ ജെപി നദ്ദ തുടങ്ങിയവരും യോഗത്തില്‍ പങ്കെടുത്തിരുന്നു.