ആമസോണില്‍ നിന്ന് ലഭിച്ച പാഴ്‌സലില്‍ മൂര്‍ഖന്‍ പാമ്പിനെ ലഭിച്ചതായി പരാതി. ബംഗളൂരു സ്വദേശികളായ ദമ്പതികള്‍ക്ക് ലഭിച്ച പാഴ്‌സലിനുള്ളിലാണ് ജീവനുള്ള മൂര്‍ഖന്‍ പാമ്പിനെ കണ്ടെത്തിയത്. സോഫ്റ്റ്‌വെയര്‍ എന്‍ജിനീയര്‍മാരായ ദമ്പതികള്‍ എക്‌സ് ബോക്‌സ് കണ്‍ട്രോളറാണ് ാമസോണിലൂടെ ഓര്‍ഡര്‍ ചെയ്തത്.
പാഴ്‌സല്‍ ലഭിച്ചതോടെ മൊബൈലില്‍ വീഡിയോ ചിത്രീകരിച്ചുകൊണ്ടാണ് ദമ്പതികള്‍ പായ്ക്കറ്റ് തുറന്നത്. ഈ സമയം പായ്ക്കറ്റിനുള്ളില്‍ നിന്ന് പാമ്പ് പുറത്തേക്ക് ചാടുകയായിരുന്നു. എന്നാല്‍ പാഴ്‌സല്‍ പായ്ക്ക് ചെയ്തിരുന്ന ടേപ്പില്‍ കുടുങ്ങിയതോടെ ദമ്പതികള്‍ കടിയേല്‍ക്കാതെ രക്ഷപ്പെട്ടു. സംഭവത്തിന് ദൃക്‌സാക്ഷികളുമുണ്ടെന്ന് ദമ്പതികള്‍ അവകാശപ്പെടുന്നു.
സംഭവത്തിന് പിന്നാലെ ഇതിന്റെ ദൃശ്യങ്ങള്‍ സാമൂഹ്യ മാധ്യമമായ എക്‌സില്‍ പങ്കുവച്ചു. വീഡിയോ പ്രചരിച്ചതിന് പിന്നാലെ ഖേദം പ്രകടിപ്പിച്ച് ആമസോണ്‍ രംഗത്തെത്തിയിട്ടുണ്ട്. തങ്ങള്‍ സംഭവം പരിശോധിക്കുമെന്നും ആമസോണ്‍ ടീം ദമ്പതികളുമായി ബന്ധപ്പെടുമെന്നും ആമസോണ്‍ എക്‌സിലൂടെ അറിയിച്ചു.
