വയനാട്ടിലെ ഉരുൾപൊട്ടലിന്റെ പശ്ചാത്തലത്തിൽ പൊതുമേഖല ഇൻഷുറൻസ് കമ്പനികൾക്ക് നിർദേശം നൽകി കേന്ദ്രധനകാര്യ മന്ത്രാലയം. ഇൻഷുറൻസ് ക്ലെയിമുകൾ വേഗത്തിൽ നടപടികൾ പൂർത്തിയാക്കി പണം നൽകണമെന്നാണ് നിർദേശം. അതേസമയം ഇൻഷുറൻസ് കമ്പനികൾ നടപടികൾ തുടങ്ങിയിട്ടുണ്ട്.
ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ (എൽഐസി), നാഷണൽ ഇൻഷുറൻസ്, ന്യൂ ഇന്ത്യ അഷ്വറൻസ്, ഓറിയൻ്റൽ ഇൻഷുറൻസ്, യുണൈറ്റഡ് ഇന്ത്യ ഇൻഷുറൻസ് എന്നിവയുൾപ്പെടെയുള്ള പൊതുമേഖലാ ഇൻഷുറൻസ് കമ്പനികളോടാണ് നടപടികൾ വേഗത്തിലാക്കാൻ ധനമന്ത്രാലയം അറിയിച്ചത്. ഇൻഷുറൻസ് ക്ലെയിമുകൾ വേഗത്തിൽ പ്രോസസ്സ് ചെയ്യാനും പണം നൽകാനും കഴിയുന്ന തരത്തിൽ ദുരന്തത്തിൻ്റെ ഇരകൾക്ക് സാധ്യമായ എല്ലാ പിന്തുണയും നൽകണം ധനമന്ത്രാലയം പറയുന്നു.
ഇതിനെതുടർന്ന് ഇൻഷുറൻസ് കമ്പനികൾ വിവിധ മാർഗങ്ങളിലൂടെ പോളിസി ഉടമകളെ ബന്ധപ്പെടുവാൻ നടപടികൾ ആരംഭിച്ചിട്ടുണ്ട്. ഇൻഷുറൻസ് തുക വേഗത്തിൽ വിതരണം ചെയ്യാൻ ഡോക്യുമെൻ്റേഷനിൽ സമഗ്രമായ ഇളവും വരുത്തിയിട്ടുണ്ട്. കേന്ദ്ര സർക്കാരും, ധനകാര്യ മന്ത്രാലയവും ദുരിതബാധിതരെ സഹായിക്കുവാൻ പ്രതിജ്ഞാബദ്ധരാണെന്ന് വ്യക്തമാക്കിയാണ് നടപടി.
വയനാട്, പാലക്കാട്, കോഴിക്കോട്, മലപ്പുറം ജില്ലകളിലെ സഹായത്തിനായി ബന്ധപ്പെടാനുള്ള വിവരങ്ങൾ നൽകുന്നതിന് ഇൻഷുറൻസ് കമ്പനികൾ വിവിധ ചാനലുകളിലൂടെ (പ്രാദേശിക പത്രങ്ങൾ, സോഷ്യൽ മീഡിയ, കമ്പനി വെബ്‌സൈറ്റുകൾ, എസ്എംഎസ് മുതലായവ) അവരുടെ പോളിസി ഉടമകളെ ബന്ധപ്പെടാനുള്ള ശ്രമങ്ങൾ ആരംഭിച്ചിട്ടുണ്ട്.
