കേരളത്തിൽ പ്രകൃതിദുരന്തങ്ങൾ ആവർത്തിക്കുന്ന സാഹചര്യത്തിൽ കേന്ദ്ര-സംസ്ഥാന സർക്കാരുകളെ അതിരൂക്ഷമായി വിമർശിച്ച് പരിസ്ഥിതി പ്രവർത്തകൻ മാധവ് ഗാഡ്ഗിൽ. പശ്ചിമഘട്ടം സംരക്ഷിച്ചില്ലെങ്കിൽ പല ദുരന്തങ്ങളും കാണേണ്ടി വരുമെന്ന് താൻ നേരത്തെ മുന്നറിയിപ്പ് നൽകിയിരുന്നുവെന്നും എന്നാൽ ആ റിപ്പോർട്ട് എല്ലാവരും ചേർന്ന് അട്ടിമറിക്കുകയായിരുന്നുവെന്നും മാധവ് ഗാഡ്ഗിൽ പറഞ്ഞതായി ഏഷ്യാനെറ്റ് ന്യൂസ് റിപ്പോർട്ട് ചെയ്തു.
രാഷ്ട്രീയ നേട്ടം മാത്രമാണ് കേന്ദ്ര-സംസ്ഥാന സർക്കാരുകളുടെ ലക്ഷ്യം. പശ്ചിമഘട്ട സംരക്ഷണത്തിനായി താൻ നൽകിയ റിപ്പോർട്ട് നടപ്പിലാക്കാൻ ആർക്കും ആർജ്ജവം ഉണ്ടായിരുന്നില്ല. പ്രകൃതി ചൂഷണത്തിനൊപ്പം കാലാവസ്ഥാവ്യതിയാനവും കൂടി ചേർന്നാണ് കേരളത്തെ ഇത്തരത്തിൽ ദുരന്തഭൂമിയാക്കി മാറ്റിയതെന്നും മാധവ് ഗാഡ്ഗിൽ അഭിപ്രായപ്പെട്ടു. പശ്ചിമഘട്ടം സംരക്ഷിച്ചില്ലെങ്കിൽ ഇനിയും പലതരം ദുരന്തങ്ങൾക്ക് കേരളം സാക്ഷിയാവുമെന്നും മാധവ് ഗാഡ്ഗിൽ മുന്നിറിയിപ്പ് നൽകി.
സംസ്ഥാന സർക്കാർ നടപ്പാക്കാൻ ഉദ്ദേശിക്കുന്ന സിൽവർ ലൈൻ പ്രൊജക്ടിനെതിരെയും അതിരൂക്ഷ വിമർശനമാണ് മാധവ് ഗാഡ്ഗിൽ ഉയർത്തുന്നത്. ഇത്തരം വലിയ പദ്ധതികൾ കേരളത്തിന് ആവശ്യമുണ്ടോ എന്നും കുറച്ച് യാത്രാസമയം ലാഭിക്കാൻ പ്രകൃതിയെ നശിപ്പിക്കണോ എന്നും മാധവ് ഗാഗിൽ ചോദിച്ചു. കേരളത്തിൽ ഇപ്പോൾ വേണ്ടത് വൻകിട നിർമ്മാണങ്ങളല്ല എന്നും മാധവ് ഗാഡ്ഗിൽ പറഞ്ഞു.
2018ലെ പ്രളയം ഉണ്ടാകുന്നതിന് വളരെ മുമ്പ് 2011-ലാണ് പശ്ചിമഘട്ട സംരക്ഷണത്തിനായി പ്രത്യേക റിപ്പോർട്ട് മാധവ് ഗാഡ്ഗിൽ സമർപ്പിച്ചത്. അതിതീവ്രമഴ മാത്രമല്ല അതോടൊപ്പം പശ്ചിമഘട്ടത്തെ പരിധിയില്ലാത്ത രീതിയിൽ ചൂഷണം ചെയ്തതും കേരളത്തിലെ പ്രകൃതിക്ഷോഭങ്ങൾക്ക് കാരണമായി. യാത്രാസമയത്തിൽ മുപ്പതോ നാൽപ്പതോ മിനിറ്റ് ലാഭിക്കാനായി പശ്ചിമഘട്ടത്തിലെ പാറയെല്ലാം തുരന്നെടുത്ത് പദ്ധതികൾ നടപ്പാക്കിയിട്ട് എന്ത് കാര്യമാണുള്ളത് എന്നും ഗാഡ്ഗിൽ ചോദിക്കുന്നു.