കെ മുരളീധരന്‍ എം.പിയുടെ വിമർശനത്തിന് മറുപടിയുമായി പി.വി അൻവർ എം.എൽ.എ. ലീഡറോടെ ബഹുമാനമുള്ളൂ എന്നും അദ്ദേഹത്തിന്റെ തഴമ്പിന്റെ കഥ പറഞ്ഞ്‌ ഇന്നും ജീവിക്കുന്ന ഇത്തിൾക്കണ്ണിയോട് അതില്ല എന്നും പി വി അന്‍വര്‍ ഫെയ്‌സ്ബുക്കിൽ കുറിച്ചു. പി വി അന്‍വര്‍ നിയമസഭാ സമ്മേളനങ്ങളില്‍ പങ്കെടുക്കാത്തത് ഗുരുതര പ്രശ്‌നമാണെന്നും ബിസിനസും നടക്കണം എംഎല്‍എയും ആകണം എന്നു പറയുന്നത് നടപ്പില്ലെന്നും കെ മുരളീധരന്‍ പറഞ്ഞിരുന്നു.
അതേസമയം താന്‍ വെസ്റ്റ് ആഫ്രിക്കയിലെ സിയാറ ലിയോണിലാണെന്നും മണ്ഡലത്തില്‍ ഇല്ലെങ്കിലും ജനങ്ങളുടെ പ്രശ്‌നങ്ങള്‍ പരിഹരിക്കുന്നതിനായി എല്ലാസമയത്തും പ്രവര്‍ത്തിക്കുന്നുണ്ടെന്നുമാണ് പി.വി അൻവർ അവകാശപ്പെടുന്നത്.
പി.വി അൻവറിന്റെ കുറിപ്പ്:
ഇവിടെ കിങ്ങിണികുട്ടന്മാരില്ല..
ജീവിക്കാനായി മണ്ണിൽ പണിയെടുക്കുന്ന കുറച്ച്‌ ജീവിതങ്ങളാണിവിടെയുള്ളത്‌..
ഇനി അവിടുത്തെ കാര്യം..
ലീഡറോടെ ബഹുമാനമുള്ളൂ.
അദ്ദേഹത്തിന്റെ തഴമ്പിന്റെ കഥ പറഞ്ഞ്‌ ഇന്നും ജീവിക്കുന്ന ഇത്തിൾക്കണ്ണിയോടതില്ല.
രാമനിലയത്തിലെ ഗീതോപദേശത്തിന്റെ കഥ പറയാൻ ഞാൻ ഉണ്ണിത്താനല്ല.
പി.വി.അൻവറാണ്..
പറയാനുള്ളത്‌ നേരിട്ട്‌ തന്നെ പറയും..