രാഹുൽ ഗാന്ധിയുടെ നേതൃത്വത്തിൽ നടക്കുന്ന ” ഭാരത് ജോടോ” യാത്രയെ വിമർശിച്ച് മന്ത്രി ശിവൻകുട്ടി. ‘യാത്രയില് പോക്കറ്റടിക്കാരുണ്ട് സൂക്ഷിക്കുക’ എന്ന പോസ്റ്റര് തന്റെ ഫേസ്ബുക്കില് പങ്കുവെച്ച് കൊണ്ടായിരുന്നു മന്ത്രിയുടെ പരിഹാസം.
രാഹുല് ഗാന്ധിയുടെ ഭാരത് ജോഡോ യാത്രയില് തമിഴ്നാട്ടില് നിന്നുള്ള പോക്കറ്റടി സംഘം കടന്നുകൂടി. നേമത്ത് നിന്നുള്ള യാത്രയിലാണ് നാലംഗ സംഘം യാത്രയില് ചേര്ന്നതായി പൊലീസ് തിരിച്ചറിഞ്ഞത്. ഓണം സമാപനഘോഷയാത്ര തുടങ്ങും മുന്പ് ഇവരെ പിടികൂടാനുള്ള ഊര്ജിത ശ്രമത്തിലാണ് പൊലീസ്.
കരമന പൊലീസ് സ്റ്റേഷന് പരിധിയില് ഇന്നു രാവിലെ രണ്ടു പോക്കറ്റടി കേസുകള് റിപ്പോര്ട്ട് ചെയ്തിരുന്നു. ജോഡോ യാത്രയില് പങ്കെടുത്ത രണ്ടുപേരുടെ പോക്കറ്റടിച്ചെന്നായിരുന്നു പരാതി. തുടര്ന്ന് യാത്രയുടെ സിസിടിവി ദൃശ്യങ്ങള് കരമന പൊലീസും തിരുവനന്തപുരം ഫോര്ട്ട് പൊലീസും ചേര്ന്ന് പരിശോധിച്ചു. തുടര്ന്നാണ് പ്രതികളെ തിരിച്ചറിഞ്ഞത്. ഇവര് മുന്പും സമാനകേസുകളില് ഉള്പ്പെട്ടവരാണെന്ന് പൊലീസ് അറിയിച്ചു.
തമിഴ്നാട്ടില്നിന്നാണ് യാത്രയുടെ ഒപ്പം സംഘം കേരളത്തിലേക്കെത്തിയതെന്നാണ് പൊലീസ് പറയുന്നത്. രാഹുല് ഗാന്ധിയെ കാണാനായി വഴിയരികില് കാത്തുനില്ക്കുന്നവരെയാണ് സംഘം ലക്ഷ്യമിടുന്നത്.