സില്വര്ലൈന് സംവാദത്തില് അനിശ്ചിതത്വം തുടരുന്നു. സാധ്യതാ പഠനം നടത്തിയ സംഘത്തലവനായ സിസ്ട്ര മുന് ഡെപ്യൂട്ടി പ്രൊജക്ട് ഡയറക്ടര് അലോക് കുമാര് വര്മയും പരിസ്ഥിതി പ്രവര്ത്തകന് ആര് ശ്രീധര് രാധാകൃഷ്ണനും സംവാദത്തില് പങ്കെടുക്കില്ല. ഇരുവരും സില്വര്ലൈന് പദ്ധതിയെ എതിര്ക്കുന്നവരാണ്. സംവാദത്തില് പങ്കെടുക്കില്ലെന്ന് അലോക് വര്മ ചീഫ് സെക്രട്ടറിയെ അറിയിച്ചു. സംവാദത്തില് നിന്ന് പിന്മാറിയതായി ആര് ശ്രീധര് കെ റെയിലിനെയും അറിയിച്ചു.
സംവാദത്തില് വ്യക്തതവേണമെന്ന് അലോക് വര്മയുടെ ആവശ്യത്തില് മറുപടി ലഭിക്കാതിരുന്നതിനെ തുടര്ന്നാണ് അദ്ദേഹത്തിന്റെ പിന്മാറ്റം. ഡിപിആറിലെ പിഴവുകള് തിരുത്താന് സര്ക്കാര് ആത്മാര്ത്ഥമായി ശ്രമിക്കുന്നില്ല. ഇനിയൊരു സംവാദത്തിന് താന് തയ്യാറല്ലെന്നും അദ്ദേഹം പറഞ്ഞു. സംവാദ പാനലില് നിന്നും ജോസഫ് സി മാത്യുവിനെ മാറ്റിയതിലും അലോക് വര്മയ്ക്ക് അതൃപ്തിയുണ്ട്.
സില്വര്ലൈന് സംവാദം നടത്തേണ്ടത് സര്ക്കാരാണ് കെ റെയില് അല്ല. സംവാദത്തിലേക്ക് ക്ഷണക്കത്ത് അയക്കേണ്ടത് സര്ക്കാരാണെന്നും ചൂണ്ടിക്കാട്ടിയാണ് നേരത്തെ അലോക് കുമാര് വര്മ ചീഫ് സെക്രട്ടറിക്ക് കത്തയച്ചത്.സര്ക്കാര് പ്രതിനിധിയോ, ചീഫ് സെക്രട്ടറിയോ കത്ത് അയക്കണം. സര്ക്കാരിന്റെ നേരിട്ടുള്ള ക്ഷണമില്ലെങ്കില് സംവാദത്തില് പങ്കെടുക്കില്ലെന്നും അദ്ദേഹം പറഞ്ഞിരുന്നു. സര്ക്കാര് പരിപാടിയെന്ന നിലയിലാണ് സംവാദത്തില് പങ്കെടുക്കാന് തീരുമാനിച്ചത്. പക്ഷേ കത്തയച്ചത് കെ റെയിലാണെന്നും, ക്ഷണക്കത്ത് ഏകപക്ഷീയമാണെന്നും അലോക് വര്മ്മ ആരോപിച്ചിരുന്നു. ഇന്ന് ഉച്ചയ്ക്കുള്ളില് വ്യക്തത ലഭിച്ചില്ലെങ്കില് സംവാദത്തില് പങ്കെടുക്കില്ലെന്നും അദ്ദേഹം പറഞ്ഞിരുന്നു.
കഴിഞ്ഞ ദിവസമാണ് സംവാദ പാനലില് നിന്ന് ജോസഫ് സി മാത്യുവിനെ ഒഴിവാക്കി ആര് ശ്രീധര് രാധാകൃഷ്ണനെ ഉള്പ്പെടുത്തിയത്. സംവാദത്തില് പങ്കെടുക്കുമെന്ന് ആര് വി ജി മേനോന് അറിയിച്ചിരുന്നു. പരിപാടിയിലേക്ക് മാധ്യമങ്ങളെക്കൂടി ക്ഷണിച്ചിരിക്കുന്നതിനാല് എതിരഭിപ്രായം ജനങ്ങളിലേക്കെത്തുമെന്നും അദ്ദേഹം പറഞ്ഞു. പദ്ധതിയെ എതിര്ക്കുന്നവരെയും അനുകൂലിക്കുന്നവരെയും പങ്കെടുപ്പിച്ചു കൊണ്ടാണ് സംവാദം. ഏപ്രില് 28 ന് രാവിലെ 11 മണിക്ക് ഹോട്ടല് താജ് വിവാന്തയില് വെച്ച് പരിപാടി സംഘടിപ്പിക്കാനാണ് നിശ്ചയിച്ചിട്ടുള്ളത്.