വിവാഹജീവിതത്തിലേയ്ക്ക് കടക്കുന്ന വേളയില് തന്നെ സിനിമാ രംഗത്ത് കൈപിടിച്ചുയര്ത്തിയ ഗുരുവായ സത്യന് അന്തിക്കാടിനെ മറക്കാതെ നയന്താര. രാജ്യം മുഴുവന് ആഘോഷമാക്കിയ താര വിവാഹത്തില് പ്രത്യേക അതിഥിയായി ഇന്നലെ സത്യന് അന്തിക്കാടും ഉണ്ടായിരുന്നു.
അദ്ദേഹത്തിന്റെ ചിത്രത്തിലൂടെയാണ് ഡയാന കുര്യന് എന്ന നയന്താര ആദ്യമായി അഭിനയരംഗത്തെത്തുന്നത്. വിവാഹത്തലേന്ന് നയന്താരയുടെ വീട്ടിലേയ്ക്ക് പ്രത്യേക ക്ഷണം സ്വീകരിച്ച് സത്യന് അന്തിക്കാട് എത്തുകയുണ്ടായി.
2003-ല് മനസിനക്കരെ എന്ന സത്യന് അന്തിക്കാട് ചിത്രത്തിലൂടെയാണ് നയന്താര അഭനയത്തിലേയ്ക്ക് ചുവടുവച്ചത്. പിന്നീട് തെന്നിന്ത്യയിലെ താരറാണി പദവിയിലേയ്ക്കുള്ള നയന്താരയുടെ യാത്ര ആരും കൊതിക്കുന്ന രീതിയിലായിരുന്നു. വര്ഷങ്ങളുടെ പ്രണയത്തിന് ശേഷം വിവാഹജീവിതത്തിലേയ്ക്ക് കടക്കുന്നപ്പോള് ചുരുക്കം ചില താരങ്ങള്ക്ക് മാത്രമേ ക്ഷണം ഉണ്ടായിരുന്നുള്ളൂ.
മലയാളത്തില്നിന്നു സത്യന് അന്തിക്കാട് കൂടാതെ ദിലീപും ചടങ്ങിനെത്തിയിരുന്നു. ഷാറുഖ് ഖാന്, രജനികാന്ത്, സൂര്യ, വിജയ് സേതുപതി, കാര്ത്തി, ശരത് കുമാര്, സംവിധായകരായ മണിരത്നം, കെ.എസ്.രവികുമാര്, നിര്മാതാവ് ബോണി കപൂര് തുടങ്ങിയവരും പങ്കെടുത്തു.